La Regenza ha prendì posiziun tar in project da consultaziun dal Departament federal da l'intern. Las midadas da l'Ordinaziun davart l'assicuranza da malsauns previsas da la Confederaziun concernan d'ina vart ils criteris da planisaziun e da l'autra vart las disposiziuns per eruir las tariffas d'in model d'indemnisaziun concret.
Per plirs motivs refusa la Regenza la midada proponida da l'ordinaziun. Ella è oravant tut da l'avis che la Confederaziun n'haja betg la cumpetenza da reglar il provediment medicinal respectivamain la furniziun da prestaziuns da sanadad en ils chantuns cun definir pretensiuns minimalas envers la qualitad. Questa cumpetenza hajan mo ils chantuns. Plinavant è la Regenza da l'avis che la midada previsa cuntegnia numerusas ulteriuras disposiziuns che muntan ina intervenziun en l'autonomia da planisaziun dals chantuns e che engrevgeschan u che impedeschan tut en tut l'access da la populaziun en chantuns cun in'urbanisaziun decentrala. Ultra da quai na vesa la Regenza da princip nagin basegn per ina revisiun parziala da l'Ordinaziun davart l'assicuranza da malsauns. Las prescripziuns actualas da l'ordinaziun realiseschan en moda cunvegnenta e suffizienta ils criteris da planisaziun unitars prescrits tenor lescha, resguardond la qualitad e la rentabilitad.
Sche la midada da l'ordinaziun avess tuttina da vegnir realisada, propona la Regenza da stritgar e d'adattar intgins puncts dal sboz da consultaziun.

Consultaziuns dal Departament federal da l'intern

Il scumond general da far fieu che vala dapi ils 25 da mars 2020 vegn abolì a partir d'immediat. Il cumenzament da matg han precipitaziuns reducì la setgira en tut il chantun ed uschia er il privel d'incendis da guaud e da cultira. Il scumond da far fieu era vegnì pronunzià er per evitar ina chargia memia gronda per ils pumpiers e per lur organisaziuns partenarias en connex cun la pandemia dal coronavirus. Cunquai ch'il dumber da cas ha pudì vegnir reducì considerablamain en il chantun Grischun, n'è er quai nagin motiv pli per mantegnair il scumond da far fieu.

La Regenza ha approvà il project "Reparaziun d'averturas e prevenziun cunter incendis da guaud 2020", in project collectiv da differentas vischnancas. Per quest intent ha ella concedì ina contribuziun chantunala da 13,3 milliuns francs.
Il project cumpiglia la reparaziun da vias da guaud e da maschinas da totalmain 74,9 kilometers ch'èn repartids sin 68 objects singuls. Tras quai vegn meglierada l'avertura da guauds da protecziun da circa 11 000 hectaras e d'ulteriurs guauds da circa 3000 hectaras. Ultra da quai cumpiglia il project la construcziun da tschintg novs batschigls d'aua da stizzar fieu: mintgamai in a Domat, a Haldenstein ed a Puntraschigna e dus a Fläsch. A Schlarigna vegn construì in conduct d'aua da stizzar fieu cun dus idrants per il cumbat cunter incendis da guaud. Plinavant cumpiglia quest project collectiv la reparaziun d'in batschigl d'aua da stizzar fieu en Val Müstair ch'è vegnì donnegià tras las malauras, sco er l'acquisiziun da material da stizzar fieu per las 12 basas da pumpiers regiunalas per incendis da guaud.

La Regenza ha approvà il project per curreger la via da Cavadura. La via da Cavadura è ina via chantunala da colliaziun e collia la fracziun Cavadura che tutga tar la vischnanca da Grüsch. Ils ultims onns èn vegnidas fatgas mo las lavurs da mantegniment necessarias vi da la via.
En il rom dal project duai vegnir renovada la surstructura e meglierada la geometria da la via da Cavadura. La via vegn schlargiada a 3,5 meters. Differentas pussaivladads da cruschar duain garantir ch'ils vehichels possian sa cruschar en moda segira e ch'il traffic betg motorisà possia circular cun dapli segirezza. Ultra da quai duain vegnir disfatgs ils mirs da crappa da bloc ed ils chanasters da crappa e remplazzads tras mirs da pais u tras scarpas d'entagl. Tut en tut custa il project circa 9,2 milliuns francs.

© Uffizi federal da topografia

Differentas organisaziuns, instituziuns, uniuns, federaziuns e fundaziuns d'utilitad publica survegnan quest onn ina contribuziun da totalmain 408 000 francs or dal retgav da las taxas da patenta d'alcohol. Tenor la Lescha d'ustaria vegnan in terz dal retgav net dal chantun or da la taglia dal commerzi en detagl cun bavrondas destilladas duvrà per intents d'utilitad publica e dus terzs per la promoziun dal turissem.
Ultra da quai vegnan pajads ora en il chantun Grischun tut en tut 659 726 francs da la dieschma d'alcohol da la Confederaziun. Ils meds finanzials vegnan duvrads per mesiras d'infurmaziun che duain gidar a prevegnir cunter problems d'alcohol sco er cunter l'abus da drogas, da narcotics e da medicaments. Plinavant vegnan ils meds finanzials impundids per mesiras per assister uffants e giuvenils da famiglias cun problems da dependenza d'alcohol sco er per programs che sa drizzan a gruppas da ristga. Ultra da quai vegnan cofinanziads posts da cussegliaziun spezialisads sco er instituziuns d'assistenza e da tractament per persunas dependentas d'alcohol, da tissis enivrants, da medicaments e da drogas. Tenor la Lescha d'alcohol survegnan ils chantuns 10 pertschient dal retgav net da l'Administraziun federala d'alcohol (dieschma d'alcohol).

Tenor il conclus da la Regenza vegn mintgamai in terz dal retgav or da la collecta da la Rogaziun federala 2020 attribuì a las suandantas organisaziuns che furneschan servetschs a favur da la populaziun grischuna e ch'èn spezialmain dumandadas pervia da la situaziun actuala: uniun Clom d'urgenza per geniturs Turitg, fundaziun Pro juventute Svizra – cussegliaziun ed agid 147 e fundaziun Chasa da dunnas dal Grischun. Il Di da la rogaziun federala è ils 20 da settember 2020. Quel di vegn fatga en tut las baselgias dal chantun ina collecta per intents d'utilitad publica. L'utilisaziun da quella vegn determinada da la Regenza. En il quint 2019 ha la collecta importà 25 500 francs. Per l'onn 2020 vegni quintà cun ina collecta da la medema dimensiun.