La Regenza dal chantun Grischun è sa cunvegnida cun in'ulteriura interpresa da construcziun davart il pajament da var 1 milliun francs. Ils pajaments d'enclegientscha al chantun ed a las vischnancas importan ussa tut en tut circa 9 milliuns francs. Ina interpresa vegn exclusa per plirs onns da la surdada da lavurs dal chantun. Il chantun Grischun ha cun quai pudì terminar l'analisa da las proceduras da cartel da la CUMCO. Cun ses proceder ha la Regenza surpiglià ina rolla da piunier en il sectur dal dretg civil da cartels e dal dretg d'acquisiziun.
La Cumissiun federala da concurrenza (CUMCO) ha terminà la stad 2019 sias investigaziuns concernent il sectur da construcziun en il chantun Grischun. En quest reguard ha ella constatà differentas cuntravenziuns cunter il dretg da cartels durant la perioda 2004 fin 2012 e sancziunà interpresas da construcziun cun multas. La Regenza dal chantun Grischun ha offrì en quest connex a las interpresas discurs d'enclegientscha per rectifitgar sancziuns tenor il dretg d'acquisiziun e pretensiuns da dretg civil.
Enclegientscha cun la Implenia Svizra SA
Il matg 2020 ha la Regenza fatg in'enclegientscha cun la Implenia Svizra SA areguard in pajament da cumpensaziun da var 1 milliun francs. L'autezza da la summa da cumpensaziun è vegnida fixada sin basa da las svieutas plausibilisadas da la CUMCO sco er sin basa d'ina controlla dals cudeschs tras ina societad da revisiun independenta. Cun fixar ils pajaments da cumpensaziun ha la Regenza ultra da quai dà in signal che la collavuraziun d'ina interpresa per restabilir la concurrenza efficazia tar acquisiziuns chantunalas possia er vegnir resguardada.
Exclusiun da la KIBAG Bauleistungen SA
Cun la KIBAG Bauleistungen SA n'ha pudì vegnir chattada fin oz nagina enclegientscha. Pervia da quai ha la Regenza pronunzià envers questa interpresa in'exclusiun da plirs onns d'incumbensas publicas dal chantun. Questa decisiun n'ha betg anc vigur legala. Tuttina è la Regenza anc adina pronta da tschertgar ina soluziun d'enclegientscha cun la KIBAG Bauleistungen SA.
Clusiun da l'analisa da las proceduras da la CUMCO
Tras l'enclegientscha cun la Implenia ha la Regenza pudì terminar per entant l'analisa dal dretg d'acquisiziun e dal dretg civil da las investigaziuns da la CUMCO. La stad 2019 èn vegnidas fatgas enclegientschas cun nov interpresas da construcziun da vias cun ina summa da cumpensaziun da circa 6 milliuns francs e la primavaira 2020 cun tschintg interpresas da construcziun engiadinaisas cun ina summa da circa 2 milliuns francs a favur dal chantun e da las vischnancas pertutgadas. Tut las interpresas han ultra da quai stuì s'obligar d'introducir in program da compliance tenor il dretg da cartels che duai garantir che las prescripziuns dal dretg da concurrenza vegnian observadas entaifer la firma.
Restabiliment d'ina concurrenza intacta
Cun pajar circa 9 milliuns francs sco er cun implementar programs da compliance è vegnida stgaffida ina premissa impurtanta per ina concurrenza gista en connex cun l'acquist da prestaziuns da construcziun e vegnida messa la basa per ina nova confidenza per il futur. La Regenza punctuescha che cunvegnas da cartel na vegnian betg toleradas e che mesiras dal dretg d'acquisiziun e dal dretg civil vegnian applitgadas consequentamain. Il medem mument ha la Regenza declerà ch'ella saja pronta d'examinar cunvegnas d'enclegientscha. Cun ses proceder ha la Regenza surpiglià ina rolla da piunier en il sectur dal dretg civil da cartels e dal dretg d'acquisiziun.
Infurmaziuns:
cusseglier guvernativ Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
Gremi: Regenza
Funtauna: rg Chanzlia chantunala dal Grischun