Pervia da las mesiras vertentas per cumbatter la pandemia COVID-19 vegn il Cussegl grond a salvar la sessiun da zercladur dals 15 fin ils 19 da zercladur 2020 en la Halla da la citad da Cuira.
Cun ina surfatscha da 2200 meters quadrat porscha la Halla da la citad da Cuira plazza avunda per che las deputadas ed ils deputads possian observar la distanza prescritta in vers l'auter durant il manaschi parlamentar. Autramain vegn il Cussegl grond a salvar la sessiun en l'urden da seser usità. Tar l'infrastructura tecnica èsi stà necessari da far tschertas restricziuns: il sistem da votaziun electronic manca e correspundentamain na pon er vegnir publitgads nagins resultats da votaziun en l'internet.
Nagin public, però livestream
Las mesiras per cumbatter la pandemia COVID-19 na permettan betg a la populaziun grischuna da visitar sco usità las sessiuns dal Cussegl grond. La Conferenza da las presidentas e dals presidents ha perquai concludì da salvar la sessiun senza public. Empè da quai vegn purschida – er ord la Halla da la citad da Cuira – ina transmissiun directa (livestream) da las tractativas dal Cussegl grond durant la sessiun da zercladur da tschintg dis, per ch'ils circuls interessads possian persequitar l'eveniment.
Per las collavuraturas ed ils collavuraturs da las medias han pudì vegnir endrizzadas plazzas da lavur avunda che adempleschan las prescripziuns vertentas da distanza e d'igiena. La rapportaziun en las medias è uschia garantida.
Plan da lavur bain chargià
Per motivs evidents è la sessiun da zercladur 2020 vegnida prolungada sin tschintg dis: 10 fatschentas e 42 intervenziuns parlamentaras stattan sin la glista da tractandas. Uschia vegn il Cussegl grond a s'occupar tranter auter da mesiras en cumbinaziun cun la pandemia COVID-19, dal quint annual dal chantun e da divers rapports da gestiun, però er dal management regiunal, da la digitalisaziun e dal guaud.
Infurmaziuns:
president dal Cussegl grond Alessandro Della Vedova, tel. +41 78 735 05 86
Gremi: Chanzlia chantunala
Funtauna: rg Chanzlia chantunala