La Regenza ha concludì da stgaffir in Post central per persunas minorennas betg accumpagnadas, uschenumnads "Minorens betg accumpagnads" (MNA), per garantir lur assistenza e lur represchentanza legala. MNA èn requirentas e requirents d'asil minorens, persunas minorennas admessas provisoricamain, fugitivas e fugitivs minorens sco er fugitivas e fugitivs minorens admess provisoricamain che sa trategnan en Svizra senza lur geniturs u senza in'autra persuna che ha la tgira genituriala; ils uffants èn savens traumatisads, perquai che la relaziun cun lur geniturs è vegnida interrutta.
Cun stgaffir in Post central MNA duai vegnir impedì ch'il bainstar da l'uffant vegnia engrevgià supplementarmain durant lur dimora en il chantun tras ulteriuras interrupziuns da relaziuns. Il post central è affilià organisatoricamain a l'Uffizi da migraziun e da dretg civil (UMDC) e vegn surveglià da la APUC. Ultra da las incumbensas da la persuna da confidenza e da la gestiun da las curatellas ha il Post central MNA er incumbensas administrativas e coordinativas. Per exempel datti tenor l'experientscha grondas variaziuns tar il dumber da requirentas e requirents d'asil minorens betg accumpagnads. En quest connex duai esser l'incumbensa dal Post central MNA d'identifitgar uschè baud sco pussaivel la necessitad d'engaschar ulteriuras mandatarias ed ulteriurs mandataris e da communitgar quai a la APUC che ha – sco autoritad da surveglianza – il dretg da dar directivas. Quella gida il Post central MNA a tschertgar mandatarias e mandataris adattads respectivamain intermediescha talas e tals tenor pussaivladad.

La Regenza ha concedì a la vischnanca da Mustér ina contribuziun chantunala da maximalmain 1 milliun francs per il project "Center Fontauna". Supplementarmain sustegnan la Confederaziun ed ils chantuns dal Gottard Grischun, Uri, Tessin e Vallais il program en il rom da la Nova politica regiunala da la Confederaziun (NPR) sur il Program San Gottardo 2020-2023 cun in emprest senza tschains da 2 milliuns francs e cun prestaziuns chantunalas equivalentas da radund 460 000 francs.
Il project "Center Fontauna" prevesa d'augmentar la valur e d'extender la purschida dal "Center da sport e cultura" actual a Mustér. Ultra da la halla da gimnastica tripla, da la halla da tennis e da la halla da raiver ch'existan gia, duain locals da fitness, da spinning e d'aerobic sco er in nov stabiliment da raiver e da bouldrar amplifitgar la purschida. Il project ha in grond niz per l'economia publica da la regiun Surselva e correspunda a la strategia regiunala per il svilup da l'economia locala.

 

© Vischnanca da Mustér / huonder bisquolm architects

La Regenza ha approvà il project collectiv "Reparaziun d'ovras da protecziun 2020" da differentas vischnancas, da la Viafier retica e da l'Uffizi da construcziun bassa dal Grischun. Il project ha la finamira da conservar ovras da protecziun existentas cunter privels da la natira mantegnend il standard oriund sco er da meglierar l'effect da quests stabiliments. Pertutgads dal project collectiv èn 47 objects. Per quai ha la Regenza concedì ina contribuziun chantunala da var 5,15 milliuns francs.

Glista dals projects d'ovras da protecziun 2020

La Regenza ha prendì enconuschientscha dal fatg ch'ils suandants projects federals vegnan suttamess a la votaziun dal pievel la dumengia, ils 27 dasettember 2020:

• Iniziativa dal pievel dals 31 d'avust 2018 "Per ina immigraziun moderada (Iniziativa da limitaziun)";
• midada dals 27 da settember 2019 da la Lescha federala davart la chatscha e la protecziun dals mamifers e dals utschels selvadis (Lescha da chatscha, LChP);
• midada dals 27 da settember 2019 da la Lescha federala davart la taglia federala directa (LTFD) (resguard fiscal dals custs per la tgira d'uffants tras terzas persunas);
• midada dals 27 da settember 2019 da la Lescha federala davart l'urden da cumpensaziun dal gudogn per persunas che prestan servetsch ed en cas d'ina maternitad (Lescha davart l'urden da cumpensaziun dal gudogn, LCG); e
• cun resalva da la reussida dal referendum: Conclus federal dals 20 da december 2019 davart l'acquist da novs aviuns da cumbat.

Sin plaun chantunal n'èn previs nagins projects da votaziun per ils 27 da settember 2020.

Ils scrutinis libers publics necessaris per occupar las funcziuns giudizialas en las dretgiras regiunalas Alvra, Engiadina Bassa/Val Müstair e Plessur han medemamain lieu ils 27 da settember 2020. Eventuals segunds scrutinis han lieu ils 18 d'october 2020.