La Regenza ha concludì da nominar ina cumissaria da la Regenza per la vischnanca da Roveredo. Anna Giacometti duai gidar la vischnanca da dumagnar sia crisa instituziunala actuala. Il mandat è terminà fin la fin da settember 2020.
Las raschuns per questa mesira da sustegn tenor il dretg da surveglianza èn la relaziun delicata entaifer la suprastanza communala, las divergenzas tranter la suprastanza e la cumissiun communala da gestiun sco er la situaziun entaifer l'administraziun communala pervia da midadas da persunal.
Dumandà il chantun d'intervegnir
Dapi las elecziuns per la legislatura 2019-2022 è l'elecziun dal tschintgavel commember da la suprastanza stada dispitaivla, quai che ha tranter auter occupà duas giadas il Tribunal federal. Suenter la sentenzia da la Dretgira administrativa chantunala dals 4 da zercladur 2020 dueva la malsegirezza arrivar bainprest ad ina fin, ma la sentenzia n'ha betg anc vigur legala. Per differents motivs han dus commembers da la suprastanza sco er la cumissiun communala da gestiun dumandà il chantun d'intervegnir. La suprastanza entira n'ha betg pudì prender formalmain posiziun davart las dumondas d'intervenziun, perquai ch'ella n'era betg abla da decider a chaschun da la sesida dals 8 da zercladur 2020.
La cumissaria cusseglia ed accumpogna
Tras la nominaziun d'ina cumissaria u d'in cumissari dispona la Regenza – tenor la Lescha da vischnancas (art. 84) – d'in med adequat per sustegnair vischnancas en cas da conflicts e durant situaziuns difficilas. Quest med na premetta betg ina dumonda da la vischnanca. La Regenza sto concepir quest med tenor las circumstanzas. En il cas qua avant maun duai la cumissaria da la Regenza cussegliar ed accumpagnar la vischnanca e pudair intervegnir a chaschun da las sesidas da la suprastanza per procurar per urden e per schliar conflicts. Sch'il quorum per prender conclus na vegn betg cuntanschì entaifer la suprastanza u sch'i resultan situaziuns da paritad, dispona ella da las vuschs necessarias. Questas ultimas cumpetenzas ha ella, fin ch'il tschintgavel commember da la suprastanza entra en uffizi cun vigur legala. Il mandat dura fin la fin da settember 2020. Fin lura sto la cumissaria da la Regenza suttametter a la Regenza in rapport davart sias constataziuns e davart sias conclusiuns. Suenter vegni ad esser l'incumbensa da la Regenza da prender las mesiras ch'èn eventualmain necessarias.
La funcziun da cumissaria da la Regenza vegn exequida dad Anna Giacometti, ch'è fin la fin da zercladur 2020 presidenta da la vischnanca da Bregaglia. Ella ha ina vasta experientscha da direcziun en ina vischnanca grischuna ed ha stuì schliar differentas grondas sfidas durant ses temp sco presidenta.
Infurmaziuns:
Thomas Kollegger, manader da l'Uffizi da vischnancas, tel. +41 81 257 23 81,
e-mail Thomas.Kollegger@afg.gr.ch
Gremi: Regenza
Funtauna: rg Uffizi da vischnancas