La Regenza ha deliberà la missiva tar la revisiun parziala da la Lescha introductiva tar l'intermediaziun da lavur e tar l'assicuranza cunter la dischoccupaziun (LItLIL/LADI) per mauns dal Cussegl grond. Cun questa revisiun vegnan adattadas las basas legalas chantunalas als novs svilups sin plaun federal en il sectur dal e-government en l'assicuranza cunter la dischoccupaziun. Las vischnancas vegnan distgargiadas en quest sectur da lur incumbensas d'execuziun.

Las persunas assicuradas ston s'annunziar persunalmain uschè baud sco pussaivel, il pli tard però l'emprim di, per il qual ellas dumondan ina indemnisaziun da dischoccupaziun, tar l'intermediaziun da lavur ed observar da quel mument davent las prescripziuns da controlla dal Cussegl federal.

E-government e distgargia da las vischnancas
Sin il stgalim da la Confederaziun vegn stgaffida actualmain la basa legala per introducir il e-government en l'assicuranza cunter la dischoccupaziun (AD) cun la finamira da distgargiar administrativamain tut ils acturs. En l'avegnir duain vegnir liquidads en moda electronica differents andaments en l'execuziun da la AD. Er l'annunzia tar l'intermediaziun da lavur po vegnir inoltrada sin via electronica. En consequenza da quai vegnan ils uffizis communals da lavur distgargiads da lur incumbensa sco post d'annunzia. En il futur duai l'annunzia vegnir fatga ubain en moda digitala ubain en moda persunala tar il center regiunal per intermediaziun da lavur cumpetent (CIL).

I sto vegnir fatg quint che la lavur administrativa en connex cun l'annunzia persunala al lieu vegn a sa reducir cleramain cun l'introducziun da l'annunzia electronica. Cumbinadas cun quai èn ina simplificaziun ed in'acceleraziun da la procedura, da las qualas profitan er las persunas assicuradas.

Controlla, sche l'obligaziun d'annunziar plazzas libras vegn observada
En il rom da la realisaziun da l'iniziativa cunter l'immigraziun da massa è vegnida introducida in'obligaziun d'annunziar las plazzas libras en professiuns u en activitads, nua che la quota da dischoccupaziun en tut la Svizra importa 5 pertschient u dapli. Durant 3 dis han las persunas dischoccupadas annunziadas tar ils CIL in dretg exclusiv da candidar per las plazzas annunziadas. Als patruns èsi scumandà da publitgar autramain u schizunt d'occupar questas plazzas durant quest temp da bloccada.

Cumpetents per realisar l'obligaziun d'annunziar plazzas libras èn ils chantuns. L'Uffizi per industria, mastergn e lavur (UCIML) prenda encunter sur il CIL Cuira las annunzias da las plazzas libras en il rom da la procedura obligatorica d'annunziar plazzas libras. Pervia da quai vegnan surdadas las incumbensas da controlla en quest sectur al UCIML.

Agiunta:
missiva

Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch

Gremi: Regenza
Funtauna: rg Departament d'economia publica e fatgs socials