Mintga trais onns circulescha in vehichel spezial sin las vias chantunalas e fa registraziuns. Questas registraziuns cuntegnan fotodatotecas d'auta resoluziun che vegnan transfurmadas cun agid da scanners da laser en datas 3D.
La rait da las vias chantunalas cumpiglia tut en tut 1362 kilometers, da quels èn 539 kilometers vias principalas ed 823 kilometers vias da colliaziun. L'onn 2020 vegnan registradas las vias en las regiuns Surselva, Valragn, Mesauc, Landwassertal, Engiadina, Malögia, Puschlav e Müstair. Questas registraziuns duran previsiblamain fin l'avust 2020.
Proceder da la registraziun
Ils apparats da registraziun èn montads sin il tetg d'in auto da persunas. Cun in scanner d'auta prestaziun e cun set cameras che han resoluziuns differentamain autas vegn registrada en emprima lingia la surfatscha da la via. Las fotodatotecas georeferenziadas che vegnan producidas uschia vegnan anonimisadas, quai vul dir che ni persunas, ni fatschas ed er nagins numers d'autos n'èn renconuschibels. Questas datas vegnan messas a disposiziun a l'Uffizi da construcziun bassa dal Grischun ed ad ulteriurs uffizis chantunals per l'ulteriura elavuraziun. Per far las registraziuns sto l'auto da registraziun charrar en tuttas duas direcziuns sin la via sitga che sa preschenta en bunas relaziuns da glisch. L'equipament è construì uschia che la sveltezza ideala da l'auto da registraziun sa chatta tranter 50 ed 80 kilometer per ura. L'auto da registraziun vegn guidà da dus operaturs versads, uschia ch'i na dat nagins impediments per il traffic.
Evaluaziun da la surfatscha da las vias
Las datas vegnan duvradas primarmain da l'Uffizi da construcziun bassa dal Grischun per giuditgar il stadi da las vias. Ils donns ed il stadi da las vias vegnan giuditgads e valitads tenor las normas respectivas da l'Associaziun svizra da las spezialistas e dals spezialists per vias e per il traffic (VSS). Decisivs per valitar il stadi èn il giudicament visual dals donns sco er la valur mesirada da la planivadad traversala dals vials. Las infurmaziuns dal stadi da las vias vegnan duvradas per planisar il mantegniment da las vias chantunalas. Mesiras da sanaziun futuras pon uschia vegnir eruidas ad ura ed èn – ultra dal standard da construcziun da las vias – infurmaziuns impurtantas per ilprogram da construcziun da vias.
Fotografias agiuntadas:
Montascha da l'equipament sin l'auto, vista da la vart
Montascha da l'equipament sin l'auto, vista da davos
Infurmaziuns:
- Steven Riedi, planisaziun dal mantegniment, Uffizi da construcziun bassa dal Grischun, tel. +41 81 257 37 34, e-mail Steven.Riedi@tba.gr.ch
- Nadja Wielath, responsabla per las medias, Uffizi da construcziun bassa dal Grischun, tel. +41 81 257 37 03, e-mail Nadja.Wielath@tba.gr.ch
Gremi: Uffizi da construcziun bassa
Funtauna: rg Chanzlia chantunala