L'Uffizi da sanadad analisescha cuntinuadamain las cifras actualas. Per il mument na s'imponan betg mesiras supplementaras. Las mesiras da distanza e d'igiena ston dentant vegnir observadas vinavant strictamain. Las lavurs preparatoricas per dumagnar ina segunda unda èn quasi terminadas. Per persunas che fan vacanzas u che sa trategnan en in "pajais da ristga" ha la Regenza installà in post d'annunzia.
Dumber stabil da cas – actualmain n'èn betg necessarias ulteriuras mesiras
L'Uffizi da sanadad ha analisà cuntinuadamain il dumber actual da cas. Suenter ch'il dumber da persunas infectadas da nov cun il coronavirus è creschì per in tschert temp en moda proporziunalmain ferma, resta il dumber da novas infecziuns ussa stabil en il chantun Grischun. Glindesdi, ils 6 da fanadur 2020, eran 5 persunas en isolaziun e 30 persunas en quarantina. Actualmain na ston naginas persunas vegnir tgiradas en in ospital en il chantun Grischun. Il contact tracing funcziuna e las resursas persunalas necessarias èn garantidas er, sch'il dumber da cas s'augmenta.
L'Uffizi da sanadad cusseglia vinavant urgentamain d'observar strictamain la regla da distanza dad 1,5 meters, las mesiras d'igiena generalas e l'obligaziun da purtar mascrinas da protecziun en il traffic public. Igl è da tegnair distanza da fullas da glieud, en spezial en locals serrads. Actualmain desista il chantun da prender ulteriuras mesiras, sco per exempel da limitar la grondezza da gruppas da persunas u l'obligaziun da purtar ina mascrina en butias e negozis. Quai pudess dentant vegnir disponì da tut temp, sch'il dumber da cas s'augmentass. La situaziun vegn analisada cuntinuadamain. Facilitaziuns da las prescripziuns federalas n'èn actualmain betg inditgadas ord vista dal chantun.
Segunda unda: elavurà in concept e quasi terminà las lavurs preparatoricas
Sut la direcziun da l'Uffizi da militar e da protecziun civila e da l'Uffizi da sanadad dal Grischun è vegnì elavurà las ultimas emnas in concept sco basa per sa preparar per in'eventuala segunda unda da l'epidemia COVID-19 en il chantun Grischun. Il concept mussa las sfidas e las pussaivladads ch'i dat per tegnair las consequenzas dal coronavirus uschè pitschnas sco pussaivel per la populaziun. En cas d'ina segunda unda vegnan las persunas responsablas a prender – sin plaun chantunal u sin plaun regiunal – mesiras uschè efficazias ma er uschè proporziunalas sco pussaivel. Ils proxims dis vegn il concept discutà definitivamain cun tut ils departaments e cun tut ils posts da servetsch involvids e deliberà.
Installà in post d'annunzia central per persunas ch'entran en Svizra
A partir d'immediat ston tut las persunas, che entran u che returnan en Svizra d'in stadi u d'ina regiun cun ina gronda ristga d'infecziun ir per 10 dis en quarantina e s'annunziar immediatamain tar l'autoritad chantunala. Per facilitar il proceder per persunas ch'entran en Svizra, ha il chantun installà in post d'annunzia central. L'ordinaziun dad ir en quarantina n'è betg ina recumandaziun, mabain dapi glindesdi, ils 6 da fanadur 2020, in'obligaziun. Il UFSP maina ina glista correspundenta dals pajais e da las regiuns da ristga, che vegn adattada regularmain.
Las persunas pertutgadas vegnan infurmadas sistematicamain en l'aviun, en il car ed als cunfins. Immediatamain suenter l'entrada en Svizra ston ellas s'annunziar tar il post d'annunzia chantunal. Tgi che na va betg en quarantina, po vegnir chastià cun ina multa fin a 10 000 francs.
Communicaziun regulara davart la situaziun actuala
Fin ils 4 d'avust 2020 n'han betg pli lieu sesidas ordinarias da la Regenza. La cuntanschibladad e l'abilitad da decider da tut ils gremis èn garantidas durant il temp da vacanzas. Mintgamai il mardi u tenor il svilup da la situaziun vegnan la situaziun actuala ed eventualas mesiras communitgadas cun ina communicaziun a las medias.
Infurmaziuns generalas:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e-mail Peter.Peyer@djsg.gr.ch
Infurmaziuns davart il post d'annunzia per persunas ch'entran en Svizra:
Nicola Kull, secretaria dal departament da sanadad, tel. +41 81 257 25 12, e-mail Nicola.Kull@djsg.gr.ch
Infurmaziuns davart las lavurs preparatoricas per la segunda unda:
Martin Bühler, manader da l'Uffizi da militar e da protecziun civila, manader dal stab parzial per la coordinaziun generala da corona, tel. +41 81 257 35 22, e-mail Martin.Buehler@amz.gr.ch
Gremi: Departament da giustia, segirezza e sanadad
Funtauna: rg Departament da giustia, segirezza e sanadad