Dapi il mars 2020 perscrutescha il Servetsch archeologic dal Grischun l'areal dal Sennhof en la citad veglia da Cuira en il rom d'ina exchavaziun d'urgenza. En quest connex ha pudì vegnir scuvrì las emnas passadas in quartier da mastergnants dal temp medieval. Numerus chats cumprovan ch'igl ha dà avant circa 1000 onns differentas activitads artisanalas en quest territori. Sco object singul extraordinari ch'è vegnì scuvrì vala ina furma singulara per cular cliniez ed objects religius.

Ils areals dal Karlihof e dal Sennhof a l'ost da la citad veglia da Cuira tutgan tar ils lieus da chats archeologics ils pli impurtants dal chantun Grischun. Gia ils onns 1984 fin 1990 han gì lieu là vastas exchavaziuns archeologicas avant la construcziun d'in local per la protecziun dals bains culturals sco er d'in nov tract per l'anteriur stabiliment giudizial Sennhof. Quella giada eran vegnidas examinadas restanzas d'abitadis sco er gruppas da fossas che cumprovan ch'il territori è vegnì utilisà bunamain senza interrupziun davent dal temp da bronz tardiv fin en il temp modern.

Dapi il mars da quest onn è il Servetsch archeologic dal Grischun puspè activ sin l'areal dal Sennhof. Il motiv è la nova concepziun planisada per l'anteriura praschun. Quella pertutga surfatschas che n'eran betg anc surbajegiadas. Las lavurs archeologicas actualas èn necessarias per pudair retschertgar, documentar ed uschia conservar per generaziuns futuras las structuras ed ils chats mantegnids en il terren anc avant il cumenzament da las lavurs da construcziun. 

Scuvrì in quartier da mastergnants dal temp medieval
Actualmain retschertga in'equipa d'exchavaziun dal Servetsch archeologic in sectur al sidost da la surfatscha da construcziun. Là èn vegnidas fatgas libras structuras discretas en furma da pitgas francadas, da foss e da fossettas sco er in nivel d'utilisaziun imposant cun mirs da crappa. Spezialmain remartgabels èn il dumber ed il gener dals objects chattads. I sa tracta da grondas quantitads d'ossa d'animals (principalmain da chavals) respectivamain da fabricats mez finids e da ruments da producziun d'entagliaders d'ossa. Er barras da metals senza fier, rudellas da fis, luadiras da vaider e fragments sumegliants èn vegnids chattads. La cumbinaziun tranter simpels edifizis da lain ed il material chattà specific dastga vegnir interpretada sco areal da lavuratoris cun differentas activitads artisanalas dal temp medieval tempriv e dal temp autmedieval.

Object singul extraordinari per l'entira Svizra
Dacurt han ins plinavant chattà in object singul tut spezial. I sa tracta d'ina platta da crap ch'è mo 9 x 8,5 x 3 centimeters gronda e che serviva sco furma per cular en seria cliniez respectivamain objects religius. Talas furmas da cular datti fitg darar en il context archeologic. Cun la furma da cular dal Sennhof a Cuira, ch'è mantegnida ordvart bain, eri pussaivel da producir avant var 1000 onns penderliezs da crusch cun ina represchentaziun da Cristus, fivlas, anels ed ureglins sco er penderliezs respectivamain applicas en furma d'evla. Tenor il stadi da las enconuschientschas actualas datescha la furma da cular dal 9. fin 11. tschientaner. Il chat extraordinari per il Grischun e per la Svizra vegn retschertgà pli detagliadamain ils proxims mais e publitgà en ina contribuziun scientifica. Ultra da quai duain ils novs chats vegnir preschentads publicamain en il rom d'ina exposiziun speziala davart il tema "Commerzi ed artisanadi tranter il Lai da Constanza ed il Rain alpin" ch'è actualmain planisada per la stad 2023 en il Museum retic a Cuira.

Fotografia agiuntad:

 

Exchavaziuns Sennhof fotografia2
Exchavaziuns Sennhof fotografia3
Object singul fotografia2

Gremi: Uffizi da cultura / Servetsch archeologic dal Grischun
Funtauna: rg Servetsch archeologic dal Grischun