En vista al svilup dals dumbers da cas ha l'Uffizi da sanadad rinforzà las controllas da la realisaziun da concepts da protecziun. Ultra da quai ston las gestiunarias ed ils gestiunaris respectivamain las organisaturas ed ils organisaturs da manaschis accessibels a la publicitad sco er d'occurrenzas verifitgar las datas da contact registradas e tegnair quellas en salv en glistas electronicas.

L'Uffizi da sanadad dal Grischun è vegnì infurmà il glindesdi davart novas infecziuns en in champ da giuvenils. En quest connex sa tracti da var 100 persunas (da quellas vivan var 80 en il chantun Grischun) – oravant tut da giuvenils tranter 9 e 13 onns e d'assistentas ed assistents. En il champ da set dis èn vegnidas exercitadas l'emna passada represchentaziuns per in concert final.

En collavuraziun cun ils organisaturs han ils contact tracers pudì prender svelt lur mesiras per controllar e per interrumper las chadainas d'infecziun. L'organisatur aveva realisà concepts da protecziun che cuntegnevan tranter auter la registraziun da las datas da contact da las visitadras e dals visitaders dal concert. Grazia a la repersequitaziun da las gruppas da visitadras e visitaders è er in sectur cun 42 persunas vegnì mess en quarantina.

En il fratemp hai puspè da ulteriuras infecziuns tranter ils giuvenils e las persunas d'assistenza. Fin a la spediziun da questa communicaziun hai dà in resultat positiv dal test tar 7 persunas dal champ da giuvenils. Schebain che las resursas dal contact tracing èn vegnidas adattadas, èn ils contact tracers vegnids confruntads cun novas sfidas: in pèr participants dal champ da giuvenils èn ids la fin d'emna, anc avant che sintoms èn sa mussads, vinavant en in auter champ da vacanzas. Las var 30 persunas participadas èn vegnidas messas immediatamain en quarantina ed il champ da vacanzas è vegnì serrà.

Actualmain sa chattan 14 persunas en isolaziun, 196 persunas en quarantina e 2 persunas vegnan tgiradas en ospitals.

Controlla rinforzada dals concepts da protecziun
Durant las emnas passadas hai dà differents gnieus d'infecziun, en spezial en manaschis da divertiment, da gastronomia e da temp liber. Pervia da quest svilup ha l'Uffizi da sanadad rinforzà – sin directiva da l'Uffizi federal da sanadad publica – las controllas areguard la realisaziun da concepts da protecziun. Uschia ston las gestiunarias ed ils gestiunaris respectivamain las organisaturas ed ils organisaturs da stabiliments e da manaschis accessibels al public sco er d'occurrenzas elavurar e realisar concepts da protecziun suffizients. Ultra da quai ston ellas ed els verifitgar las datas da contact registradas (num, prenum e numer da telefon), avant che laschar entrar u conceder l'access a las persunas, e tegnair en salv questas registraziuns en ina glista electronica structurada.

Vinavant èsi chaussa da las vischnancas da controllar e da far valair ils concepts da protecziun. Ellas vegnan incumbensadas da rinforzar lur activitad da controlla e da controllar pli savens, sch'ils concepts da protecziun en manaschis ed en stabiliments accessibels al public sco er ad occurrenzas vegnan realisads en moda suffizienta. Il dumber da las controllas fatgas sco er las mesiras ordinadas ston las vischnancas communitgar da nov ina giada per emna a l'Uffizi da sanadad che transmetta questas datas alura a l'Uffizi federal da sanadad publica.

La protecziun da la populaziun ha anc adina emprima prioritad. L'Uffizi da sanadad appellescha pervia da quai d'observar vinavant las reglas d'igiena e da cumportament. Ultra da quai èsi recumandabel da purtar ina mascrina adina, sche la distanza dad 1,5 meters na po betg vegnir observada e sch'i n'èn montadas naginas barrieras sco paraids da separaziun.

Infurmaziuns:
Rudolf Leuthold, manader da l'Uffizi da sanadad, tel. +41 81 257 26 41, e‑mail Rudolf.Leuthold@san.gr.ch

Gremi: Uffizi da sanadad
Funtauna: rg Uffizi da sanadad