Piz Palü, Sciora, Forno – films istorics da muntognas fatgs da l'alpinist Emil Meier (1914 fin 1950) ch'è sa disgrazià avant 70 onns, pon vegnir admirads da nov en il portal da medias audiovisualas dal Grischun. Tut en tut èn arrivadas sis rollas da film en l'inventari da la Biblioteca chantunala.

Ils 13 d'avust 1950 è sa disgrazià mortalmain l'alpinist svizzer Emil Meier sin il spitg Brouillard dal Mont Blanc. Uschia è ida a fin la giuvna vita d'in alpinist che aveva gì blers puncts culminants alpinistics durant ils onns 1930 e 1940, sco p.ex. l'emprima ascensiun d'enviern dal spitg Peuterey al Mont Blanc, da l'ur al nordvest da la Sciora di Fuori u la traversada d'enviern dal Täschhorn. Davart intginas ascensiuns datti rapports impressiunants en "Die Alpen" – redigids dad Emil Meier u da ses camarats Hannes Huss, Josef Borde e May Oechslin.

Cun la camera sin aventura en muntogna
Dals rapports resulti che Meier purtava cun sai – ultra d'in grev equipament alpinistic – er ina camera, cun la quala el filmava sias aventuras en muntogna. Sis rollas da film dad Emil Meier èn arrivadas sco regal en l'inventari da la Biblioteca chantunala ed èn vegnidas digitalisadas da quella. Per il di da la mort da l'alpinist renda il portal da medias audiovisualas dal Grischun ussa accessibels ils films. Els dattan invista dals daletgs e strapatschs d'in alpinissem avant l'equipament alpinistic tecnic spezialisà. En ils films cumpara il Grischun cun turas da raiver al Piz Palü, a la Sciora ed al Forno sco er cun turas da skis davent da Tavau, però er cun bels maletgs da la Val Müstair.

Fotografias agiuntadas:

Infurmaziuns:
- Petronella Däscher, bibliotecaria chantunala, Biblioteca chantunala dal Grischun, tel. +41 81 257 28 21, e-mail Petronella.Daescher@kbg.gr.ch
- Christian Brassel, collavuratur portal da medias audiovisualas, Biblioteca chantunala dal Grischun, tel. +41 81 257 28 60, e-mail Christian.Brassel@kbg.gr.ch

Gremi: Uffizi da cultura
Funtauna: rg Uffizi da cultura