Sut la devisa "I pertutga nus tuts" han lieu dals 2 da settember fin ils 8 d'october 2020 – en collavuraziun cun radund 50 partenaris – ils 4. dis d'acziun grischuns per la sanadad psichica. En l'entir chantun Grischun vegnan organisadas passa 60 occurrenzas che fan curaschi, che infurmeschan e che inspireschan.

Ensemen cun var 50 partenaris va l'Uffizi da sanadad dal Grischun cun il tema "Sanadad psichica" en la publicitad. Ils dis d'acziun "I pertutga nus tuts" cun passa 60 occurrenzas envidan la populaziun a vegnir a savair, co ch'ins mantegna la sanadad psichica e co ch'ins fa frunt a squitschs ed a crisas. Ils temas tanschan da "demenza – umor po gidar" sur in "crashcurs per babs" fin ad in lavuratori da grafits cun Fabian Bane Flurin, che duai encuraschar ils giuvenils da realisar lur siemis.

Curs d'emprim agid dad ensa – gidar auters, rinforzar sasez
Durant ils dis d'acziun han lieu per l'emprima giada en il Grischun "curs d'emprim agid per la sanadad psichica dad ensa". Ils curs d'emprim agid dad ensa qualifitgeschan laics per s'avischinar a persunas cun problems psichics e per prestar emprim agid. La Crusch cotschna dal Grischun porscha ils curs per in pretsch reducì a Cuira, a Glion ed a Zernez.

L'atgna sanadad psichica po vegnir rinforzada
Nus n'essan mai dal tuttafatg sauns, sch'i na va betg er bain cun nossa psica. La psica po, gist sco il corp, vegnir rinforzada e tgirada. Savens vegn ella però resguardada pir, cur ch'i sa mussan mals. Ir enturn cun grevezzas e cun crisas psichicas tutga tar la vita. Circa mintga segunda fin terza persuna survegn ina greva malsogna psichica durant sia vita. Chaussas engrevgiantas vegnan dentant tematisadas memia pauc e malsognas psichicas vegnan anc adina stigmatisadas fermamain. Per mantegnair la sanadad psichica èsi impurtant da tschertgar il discurs, da sa barattar cun auters umans e da dumandar u da porscher agid en cas da basegn. Plinavant èsi cumprovà scientificamain che pitschnas activitads quotidianas, sco sa mover, ir a l'aria frestga u esser creativ, rinforzan la psica.

Agiunta: 
carnet da program

Infurmaziuns:
Valeria Ciocco, Uffizi da sanadad dal Grischun, manadra da program "Sanadad psichica", tel. +41 81 257 64 10, e‑mail Valeria.Ciocco@san.gr.ch

Gremi: Uffizi da sanadad
Funtauna: rg Uffizi da sanadad