La Regenza ha prendì enconuschientscha dal concept per la planisaziun eventuala concernent ina segunda unda en il Grischun. Il mussavia serva a l'Uffizi da sanadad sco basa da decisiun per exequir mesiras futuras en connex cun la pandemia COVID-19. Ultra da quai è avant maun il rapport da l'incumbensà chantunal per la protecziun da datas concernent la communicaziun da datas a las vischnancas tras l'Uffizi da sanadad chantunal.

En il rom da la midada da la direcziun dal Stab directiv chantunal (SDC) a l'Uffizi da sanadad è il stab parzial SDC vegnì incumbensà il cumenzament da zercladur d'examinar eventuals scenaris en connex cun ina segunda unda da la pandemia e da preparar propostas per mesiras correspundentas per mauns da la Regenza. Il concept "Pandemia da COVID-19: planisaziun eventuala per ina segunda unda en il chantun Grischun" e ussa avant maun. El tegna quint da las experientschas fatgas fin ussa en il cumbat cunter la pandemia e vala sco basa per la preparaziun cunter in'eventuala segunda unda en il Grischun. La Regenza ha prendì enconuschientscha dal concept che mussa a maun da trais eventuals scenaris las sfidas pussaivlas. Ina tscherna da criteris, che vegnan cumparegliads cun circumstanzas concretas, porscha a l'Uffizi da sanadad ina basa da decisiun per realisar ulteriuras mesiras per tegnair tut en tut uschè pitschnas sco pussaivel las consequenzas dal coronavirus per la populaziun, per l'economia e per la societad.

Differenzas localas u regiunalas pussaivlas en la realisaziun
Per ils scenaris descrits en il concept èn vegnidas definidas valurs minimalas e mesiras respectivas che ston vegnir prendidas. En cas d'ina segunda unda ston las persunas responsablas en il chantun examinar – en dependenza dal context, da la situaziun geografica e sin basa da l'efficacitad – sche las mesiras che ston eventualmain vegnir prendidas en il cas specific èn commensuradas, e quai avant ch'ellas vegnan realisadas. En dependenza da la furma da derasaziun dal virus poi uschia dar differenzas localas u regiunalas tar la realisaziun entaifer il chantun.

Nagina basa legala per communitgar datas a las vischnancas
En connex cun l'elavuraziun da datas da persunas ch'èn pertutgadas da COVID-19 è l'Uffizi da sanadad sa drizzà a l'incumbensà per la protecziun da datas dal chantun. Quests scleriments han servì tranter auter per vegnir a savair, sche l'Uffizi da sanadad è obligà da dar vinavant datas da persunas pertutgadas ch'èn en isolaziun, en quarantina u ch'èn returnadas da pajais da ristga.

Tenor l'art. 3 lit. c da la Lescha federala davart la protecziun da datas (LPD) vegnan datas davart la sanadad qualifitgadas sco datas persunalas ch'èn spezialmain degnas da vegnir protegidas. La communicaziun da questas datas vegn reglada en ils art. 17 e 19 LPD. Tenor questas disposiziuns dastgan datas da persunas vegnir communitgadas da princip mo, sch'igl exista ina basa legala per quai. Per la communicaziun da datas da sanadad tras l'Uffizi da sanadad a las vischnancas na sa lascha deducir nagina basa legala or da la Lescha d'epidemias (LEp). En il rapport constatescha l'incumbensà per la protecziun da datas che la communicaziun da datas ad ina vischnanca en il senn d'in agid uffizial n'è betg pussaivla, perquai che las vischnancas n'han nagina incumbensa legala per exequir la LEp. Sa basond sin la Lescha chantunala da sanadad (art. 5 al. 1 lit. h LSan) ha il chantun sulettamain la cumpetenza d'exequir la LEp.

En il Grischun sa chattan actualmain 32 persunas en isolaziun, var 147 persunas en quarantina, ed 0 persuna vegn tgirada en in ospital vegnan tgiradas en ospitals. Tras quai ch'ils contact tracers èn intervegnids svelt en cas da novas infecziuns, èsi stà pussaivel da controllar e d'interrumper svelt las chadainas d'infecziun.

Infurmaziuns:
- cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch
- Rudolf Leuthold, manader da l'Uffizi da sanadad, tel. +41 81 257 26 41, e‑mail Rudolf.Leuthold@san.gr.ch

Gremi: Uffizi da sanadad
Funtauna: rg Departament da giustia, segirezza e sanadad