La Regenza ha concludì da sustegnair finanzialmain il project "Agricultura dal Grischun favuraivla al clima". Per la fasa da pilot che dura da l'onn 2021 fin l'onn 2025 garantescha ella tut en tut ina contribuziun da 6,4 milliuns francs. Uschia poi vegnir cumenzà a realisar la fasa da pilot anc quest atun.
En l'entira Svizra è l'agricultura responsabla per circa 13 pertschient da las emissiuns da gas cun effect da serra. La reducziun dals gas cun effect da serra (GES) e l'adattaziun a la midada dal clima tutgan tar las sfidas ecologicas, socialas e politic-economicas las pli impurtantas dals proxims onns e decennis. L'agricultura ha in potenzial relativamain grond per reducir sias emissiuns da gas cun effect da serra sco er per liar a lunga vista CO2 en il terren. Correspundentamain duai ella er gidar a proteger il clima.
La conscienza creschenta per il clima tar la populaziun cuntegna er schanzas per l'agricultura. Uschia po l'agricultura s'etablir en la producziun favuraivla al clima da victualias, sin il champ da la producziun d'energias regenerablas u sco actura che stgaffescha humus, accumulond duraivlamain CO2 en il terren. Ultra da quai crescha la conscienza da las consumentas e dals consuments per products che derivan d'ina agricultura favuraivla al clima.
Il project e las finamiras
En la pratica n'è l'efficacitad da las mesiras per reducir ils gas cun effect da serra en l'agricultura strusch experimentada. Valurs d'experientscha per realisar e per acceptar la reducziun a cundiziuns praticas mancan per gronda part. Per l'ina duai il project iniziar la midada ad in'agricultura che schanegia il clima e per l'autra stgaffir las basas concretas per ch'ils manaschis agriculs dal Grischun possian sa posiziunar cun success sin il martgà grazia a victualias producidas schanegiond il clima. Tranter auter è la finamira quella da reducir l'emissiun da l'agricultura grischuna d'approximativamain 270 000 tonnas CO2 per annualmain 50 pertschient. Per cuntanscher questa finamira duain vegnir realisads ed experimentads durant ils onns 2021 fin 2025 projects da pilot e mesiras d'innovaziun per reducir l'emissiun da CO2 sin 50 manaschis agriculs represchentativs dal Grischun. A partir da l'onn 2026 duain las mesiras ch'èn sa cumprovadas e ch'èn sa mussadas sco adattadas per la massa, vegnir extendidas sin l'entira agricultura grischuna.
Promoziun tras il chantun
Sa basond sin la Lescha chantunala d'agricultura sustegna il chantun la fasa da pilot dal project, che dura 5 onns e che custa circa 7 milliuns francs, cun contribuziuns da tut en tut 6,4 milliuns francs. Da questa summa pervegnan 4,3 milliuns francs directamain – sco contribuziun da promoziun – als manaschis agriculs che reduceschan lur emissiun da CO2 tras las mesiras che ston vegnir experimentadas. En media vegnan pajads 120 francs per onn e per tonna CO2 evitada. Ils meds finanzials restants èn necessaris per la scolaziun, per la communicaziun, per la direcziun dal project sco er per incumbensas da controlling.
Ils manaschis agriculs ch'èn vegnids tschernids per la fasa da pilot, èn obligads da sa participar ad in program che serva a survegnir las enconuschientschas da basa necessarias. Suenter realiseschan quests manaschis projects da pilot ed experimenteschan mesiras innovativas, cun las qualas po vegnir reducì uschè bler CO2 sco pussaivel.
Infurmaziuns:
Rcusseglier guvernativ Marcus Caduff, schef dal Departament d'economia publica e fatgs socials, tel. +41 81 257 23 01, e-mail Marcus.Caduff@dvs.gr.ch
Funtauna: rg Departament d'economia publica e fatgs socials
Gremi: Regenza