L'october 2020 sa raduna il Cussegl grond puspè en l'edifizi dal Cussegl grond. Tras quai ch'i ston vegnir purtadas mascrinas, èsi pussaivel da lavurar en l'edifizi dal parlament malgrà Covid-19.

A chaschun da sia ultima sesida ha la Conferenza da las presidentas e dals presidents dal Cussegl grond concludì da puspè sa radunar en l'edifizi dal Cussegl grond. Quai suenter ch'ina sessiun era vegnida annullada e duas sessiuns avevan gì lieu extra muros. En collavuraziun cun la media chantunala e cun l'Uffizi da construcziun auta èn ins vegnì a la conclusiun che quai è pussaivel mo cun in'obligaziun generala da purtar mascrinas en l'edifizi, perquai che las distanzas minimalas na pon betg vegnir observadas pervia da las relaziuns da spazi. Mesiras da construcziun – sco per exempel paraids da plexiglas – n'èn betg cunvegnentas en l'edifizi dal Cussegl grond pervia da las stretgas relaziuns da spazi.

Obligaziun generala da purtar mascrinas – tribuna averta per aspectaturas ed aspectaturs
La sanadad da tut las persunas che sa movan entaifer l'edifizi dal Cussegl grond stat fermamain a cor a la Conferenza da las presidentas e dals presidents. Per tut las persunas che sa trategnan en l'edifizi vala perquai l'obligaziun da purtar ina mascrina. Quella vala er per il public che po puspè persequitar la sessiun al lieu. Pervia da l'obligaziun da purtar mascrinas n'èsi betg necessari da registrar las persunas ch'entran en l'edifizi dal Cussegl grond. La populaziun interessada vegn dentant supplitgada da prender cun sai sezza las mascrinas. Per motivs igienics e per evitar fullas davant las maisas da distribuziun na pon vegnir messas da disposiziun naginas mascrinas.

Tras quai ch'ins sto purtar mascrinas, scrodan er las restricziuns per la lavur da las collavuraturas e dals collavuraturs da las medias. Durant la sessiun d'october 2020 survegnan ellas ed els puspè access a la sala.

Infurmaziuns:
Spresident dal Cussegl grond Martin Wieland, tel. +41 79 799 61 15

Gremi: Chanzlia chantunala
Funtauna: rg Chanzlia chantunala