La Regenza vul rinforzar la Cassa da pensiun dal Grischun (CPGR) e pussibilitar prestaziuns cumpetitivas. Per quest intent duain vegnir auzadas las contribuziuns da spargn per las persunas assicuradas. Cun quai ha la Regenza er reagì sin ils basegns da differents patruns affiliads che pretendan ch'il plan da provediment existent vegnia adattà.

Ils elements centrals per fixar las rentas èn sa midads fermamain ils ultims onns. Il nivel dals tschains è – er ord vista istorica – extremamain bass, e l'aspectativa da vita crescha d'in cuntin. Tuts dus svilups engrevgeschan fermamain las cassas da pensiun.

Las prestaziuns da rentas sa reduceschan
Fin l'onn 2005 sa chattava la tariffa da conversiun da la CPGR – la procentuala dal chapital spargnà che vegn pajà ora a las persunas pensiunadas mintga onn sco renta – tar 7,2 pertschient. Dapi lura ha la tariffa stuì vegnir reducida cuntinuadamain, quai che chaschuna rentas pli bassas. La cumissiun administrativa da la CPGR ha concludì l'ultima giada l'onn 2015 ina reducziun a partir da l'onn 2017 che dura fin l'onn 2024. Durant quest temp sa reducescha la tariffa da conversiun reglamentarica da 6,55 pertschient cuntinuadamain a 5,49 pertschient. I sa mussa che questa reducziun dura memia ditg e ch'ella è insuffizienta. Senza cuntramesiras vegnan las prestaziuns da rentas a sa pegiurar vinavant.

Il basegn d'agir è cumprovà
L'onn 2019 ha la CPGR fatg in'analisa cumplessiva da benchmark cun cassas da pensiun publicas cumparegliablas. En quest connex èsi sa mussà che la CPGR è a la cua tar bleras cumponentas da prestaziun. Cun far l'adattaziun necessaria da las basas tecnicas daventa la largia anc pli gronda. La cumparegliaziun da la finanziaziun ha mussà che la CPGR ha procentualmain las contribuziuns da spargn las pli bassas. Per che las prestaziuns na stoppian betg vegnir reducidas anc pli fitg, dumonda la Regenza – sur ina midada da la Lescha davart la Cassa da pensiun – contribuziuns da spargn pli autas. Il chantun, las instituziuns autonomas da dretg public e las vischnancas affiliadas duain restar patruns attractivs.

Infurmaziuns:
president da la Regenza dr. Christian Rathgeb, schef dal Departament da finanzas e vischnancas, e-mail Christian.Rathgeb@dfg.gr.ch

Gremi: Regenza
Funtauna: rg Chanzlia chantunala