La Regenza ha avert la consultaziun per il sboz d'ina revisiun parziala da la Lescha introductiva tar il Cudesch civil svizzer en il sectur dal register funsil. Qua tras duai vegnir realisada ina incumbensa dal Cussegl grond che vul abolir la limitaziun da consultaziuns da proprietarias e proprietaris da bains immobigliars.

En consequenza d'ina revisiun dal dretg federal èn vegnidas adattadas l'onn 2014 en il chantun Grischun las disposiziuns davart il register funsil en la Lescha introductiva tar il Cudesch civil svizzer (LItCCS). Questas adattaziuns èn entradas en vigur il 1. da schaner 2015. Tranter auter era vegnida introducida ina disposiziun, tenor la quala il chantun publitgescha en l'internet las datas da proprietarias e proprietaris da bains immobigliars ch'èn cuntegnidas en il register funsil e che pon vegnir consultadas senza stuair cumprovar in interess. Las prescripziuns dal dretg davart la protecziun da datas èn vegnidas observadas. En spezial per garantir la protecziun cunter consultaziuns da seria era il dumber vegnì limità a tschintg consultaziuns per di.

Las datas dal register funsil èn vegnidas publitgadas en l'internet sur il portal da geodatas da la GeoGR SA (www.geogr.ch). Là pon tranter auter vegnir consultads fin maximalmain tschintg proprietarias e proprietaris da bains immobigliars per di. 

Incumbensa dal Cussegl grond per abolir la limitaziun
En la sessiun da december 2019 è l'incumbensa Derungs concernent la consultaziun da datas da proprietaris da bains immobigliars en il center da geodatas dal Grischun GeoGR vegnida acceptada per mauns da la Regenza. Qua tras è la Regenza vegnida incumbensada d'eliminar – en il senn d'ina reducziun concreta da la birocrazia – la limitaziun da tschintg consultaziuns per di e per persuna en la LItCCS (art. 146c al. 2). Correspundentamain sto quest artitgel vegnir suttamess ad ina revisiun.

Revisiun parziala per realisar l'incumbensa
En il sboz vegni proponì da stritgar la limitaziun da tschintg consultaziuns per di. Empè da quai duai la disposiziun vegnir concepida uschia, che la Regenza sto garantir la protecziun cunter consultaziuns da seria e pia er la protecziun da datas. La protecziun cunter consultaziuns da seria prescritta dal dretg federal scumonda da permetter in dumber illimità da consultaziuns da proprietarias e proprietaris da bains immobigliars. Sin il stgalim da l'ordinaziun sto la Regenza perquai realisar ina soluziun concreta che ademplescha las pretensiuns da protecziun. Cun questa soluziun duain esser pussaivlas fin circa 50 consultaziuns per di.

Infurmaziuns:
cusseglier guvernativ Marcus Caduff, schef dal Departament d'economia publica e fatgs socials, tel. +41 81 257 24 01, e‑mail Marcus.Caduff@dvs.gr.ch

Funtauna: rg Departament d'economia publica e fatgs socials
Gremi: Regenza