La Regenza grischuna ha nominà Angelo Roberto sco nov manader da l'Administraziun chantunala da taglia. El vegn a surpigliar questa funcziun il 1. da zercladur 2021.

La Regenza grischuna ha elegì Angelo Roberto, lic. rer. pol. ed expert fiscal cun diplom federal, sco nov manader da l'Administraziun da taglia. Angelo Roberto ha 41 onns, è burgais da Muri ed abita a Grüsch. El daventa successur dad Urs Hartmann che va en pensiun suenter avair manà l'Administraziun da taglia durant blers onns.

Angelo Roberto è econom (Universitad da Berna) e dispona d'in diplom federal sco expert fiscal. El ha lavurà durant plirs onns tar ina gronda societad da revisiun sco senior tax consultant, avant ch'el ha midà avant 10 onns tar l'Administraziun chantunala da taglia. Là ha el cumenzà sco revisur da taglia, è daventà l'onn 2013 manader da team e maina dapi l'onn 2018 la partiziun Revisurat.

L'Administraziun da taglia furnescha numerus servetschs. Ella è responsabla per exequir la Lescha chantunala da taglia e la Lescha federala davart la taglia federala directa sco er per restituir la taglia anticipada. Questas vastas cumpetenzas cumpiglian la registraziun dals pajataglias e dals causals fiscals, la taxaziun (da var 180 000 persunas natiralas e da var 13 000 persunas giuridicas), proceduras da meds legals sco er acziuns d'incasso. Tar las incumbensas tutgan er las fixaziuns da la pratica, l'acquisiziun da l'infrastructura necessaria da l'informatica u la producziun da decleraziuns da taglia e l'emissiun da quints. En quest connex è Angelo Roberto responsabel per la direcziun generala da var 200 collavuraturas e collavuraturs.

Fotografia agiuntada:

Infurmaziuns:
president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e‑mail Christian.Rathgeb@dfg.gr.ch

Gremi: Regenza
Funtauna: rg Departament da finanzas e vischnancas