La campagna da prevenziun cunter l'abus d'alcohol e per la promoziun da la sanadad "Genussbeiz.ch" vegn terminada la fin d'october. Il project è vegnì lantschà il cumenzament da l'onn 2016 da l'Uffizi da sanadad, da GastroGrischun e da hotelleriesuisse Grischun. Ils ultims 5 onns èn numerus hotels, restaurants e bars en il Grischun s'engaschads per conturns da lavur sauns e s'obligads d'observar la prescripziun da nulla promils a la plazza da lavur.

En il rom dal "Program grischun cunter l'alcohol" s'engascha l'Uffizi da sanadad cun campagnas da prevenziun per reducir problems cun alcohol a la plazza da lavur. Il punct da partenza da la lavur da prevenziun è stada l'hotellaria e la gastronomia grischuna. Quai è numnadamain la branscha cun il dumber il pli grond da persunas emploiadas. Las collavuraturas ed ils collavuraturs en hotels, restaurants e bars han ultra da quai mintga di contact cun alcohol. Qua èsi perquai spezialmain impurtant d'agir cun responsabladad. La finamira da la campagna è stada quella d'infurmar e da sensibilisar las persunas emploiadas en questa branscha. 

Impedir la dependenza d'alcohol senza diabolisar l'alcohol
L'alcohol è in bain cultural e la gronda part da la populaziun svizra al baiva. Per l'hotellaria e la gastronomia è el plinavant ina funtauna impurtanta d'entradas. "Genussbeiz.ch" ha tematisà l'alcohol sco product da giudiment. En il rom d'occurrenzas da sommelier han las collavuraturas ed ils collavuraturs dals manaschis participads survegnì l'occasiun d'extender lur savida davart bieras svizras e vins svizzers. A chaschun da lavuratoris e da coachings han persunas directivas survegnì cussegls per discurs difficils ed infurmaziuns co agir correctamain en cas da stress, in dals motivs ils pli frequents per problems cun alcohol. Il material da la campagna cun cussegls da giudiment e da dumagnar stress sco er ina preschientscha dals manaschis sin la pagina d'internet www.genussbeiz.ch sco er en tschertas medias e sin tscherts chanals online han cumplettà la purschida.

Consum annual per persuna en Svizra (2018)

Engaschament allegraivel da la branscha
La campagna ha chattà bun'accoglientscha tar la branscha. Tut en tut 80 manaschis gastronomics èn s'annunziads per la campagna ed han introducì – sut la devisa "Cuminaivlamain per ina cultura da baiver cun responsabladad" – ina prescripziun da nulla promils durant il temp da lavur. Ils manaschis han mess cun quai in cler accent per conturns da lavur sauns. Las finamiras da la campagna han pudì vegnir cuntanschidas. Ina retrospectiva da la campagna cun vuschs da las persunas participadas chattais Vus sut www.genussbeiz.ch.

S'engaschar er vinavant
Il giavisch dals iniziants è quel ch'ils manaschis s'engaschian er suenter la campagna. Per ulteriuras infurmaziuns ed agids en connex cun il tema alcohol a la plazza da lavur renvieschan els a la pagina d'internet www.alkoholamarbeitsplatz.ch da Dependenzas Svizra.

Agiunta:

Infurmaziuns:
Denise Rudin, Uffizi da sanadad, manadra da la partiziun Promoziun da la sanadad e prevenziun, vicemanadra dal Program grischun cunter l'alcohol, tel. +41 81 257 64 02 u +41 78 746 42 20, e-mail Denise.Rudin@san.gr.ch

Gremi: Uffizi da sanadad
Funtauna: rg Uffizi da sanadad