Pervia da la situaziun da pandemia actuala duain las vischnancas survegnir la pussaivladad da realisar votaziuns a l'urna empè da radunanzas communalas. Cun relaschar in'ordinaziun sin basa dal dretg d'urgenza augmenta la Regenza la libertad d'agir da las vischnancas. Uschia garantescha ella l'abilitad d'agir da las vischnancas sco er il dretg da cundecisiun democratic da las persunas cun dretg da votar.

Las restricziuns che la Confederaziun ha relaschà concernent occurrenzas e che valan dapi ils 29 d'october 2020 na pertutgan da princip betg las radunanzas communalas: las radunanzas politicas da las legislativas sin plaun federal, chantunal e communal èn exclusas explicitamain da las restricziuns concernent occurrenzas (maximalmain 50 persunas). La situaziun da partenza è ussa pia autra che quella da la primavaira, cur che las radunanzas na dastgavan betg vegnir realisadas pervia dal scumond dal Cussegl federal da sa radunar.

Decisiv è il giudicament al lieu
Pervia da las circumstanzas localas pon resultar situaziuns che rendan facticamain nunpussaivel da realisar radunanzas communalas u che restrenschan ina realisaziun. In motiv po esser quel ch'ina vischnanca n'ha naginas localitads adattadas per realisar la radunanza cun las mesiras da protecziun necessarias, malgrà l'obligaziun da purtar ina mascrina. Er guntgir en ina vischnanca vischina u transmetter la radunanza en ulteriuras localitads n'èn betg en mintga cas opziuns raschunaivlas. Singulas vischnancas han gia exprimì lur quità ch'i sajan avant maun indizis serius che fitg bleras persunas cun dretg da votar na sa participeschian betg u na possian betg sa participar a las radunanzas communalas. Sche bleras persunas na pon betg sa participar a la radunanza pervia d'ina quarantina u per motivs epidemiologics (p.ex. resalvas areguard la sanadad u gruppas da ristga), ha quai per consequenza che numerusas persunas cun dretg da votar vegnan exclusas da la cooperaziun politica. Per tals cas excepziunals dat il chantun – sin basa dal dretg d'urgenza – a las vischnancas la pussaivladad da realisar ina votaziun a l'urna empè d'ina radunanza communala.

Garantir la furmaziun da la voluntad
Cuntrari a l'Ordinaziun da cumpetenzas ch'era vegnida relaschada sin basa dal dretg d'urgenza e ch'è stada en vigur fin ils 22 da zercladur 2020, na duai questa pussaivladad da nov betg mo valair per fatschentas betg suspensiblas. La situaziun difficila actuala pretenda che l'abilitad d'agir da las vischnancas resta garantida senza restricziuns. Las vischnancas ston prender tut las mesiras pretendiblas e raschunaivlas, per che las votantas ed ils votants possian exprimer lur libra voluntad er a l'urna. Latiers tutgi che la suprastanza communala publitgeschia uffizialmain il proceder, ch'ella motiveschia en la publicaziun pertge ch'ella è da l'avis ch'i na saja betg responsabel da realisar ina radunanza, e ch'ella preschentia en ina missiva ils puncts da vista decisivs respectivamain essenzials per la furmaziun da la voluntad. En cas da fatschentas betg suspensiblas sto la suprastanza communala explitgar en ina missiva l'urgenza e la necessitad da las fatschentas e tractar l'eventuala critica envers las fatschentas. Per las autras fatschentas sto la suprastanza communala realisar obligatoricamain ina consultaziun adequata ed orientar en moda transparenta davart ils resultats da la consultaziun. Ina consultaziun è cunvegnenta, sche las persunas cun dretg da votar vegnan integradas en il process da la furmaziun da la voluntad en ina dimensiun suffizienta per la fatschenta (areguard il temp ed areguard la materia).

Champ d'applicaziun
Er per las vischnancas burgaisas, per las regiuns e per las corporaziuns da vischnancas pon resultar dumondas cumparegliablas. Perquai duai l'ordinaziun valair confurm al senn er per questas instituziuns. Las disposiziuns valan fin ils 30 d'avrigl 2021.

Infurmaziuns:
- dr. Christian Rathgeb, president da la Regenza, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch

Gremi: Regenza
Funtauna: rg Uffizi da vischnancas