Il ust 2020 ha la presidenta da la Confederaziun Simonetta Sommaruga undrà sin il Rütli las eroxas ed ils eroxs secrets dal mintgadi durant il temp da corona. En quest rom ha ella surdà a las totalmain 26 delegaziuns chantunalas mintgamai ina plantina d'in mailer. Mintga chantun ha pudì decider sez, nua che ses mailer duai vegnir plazzà pli tard. Sco represchentanta da tut las eroxas e tut ils eroxs da corona en il Grischun ha la delegaziun grischuna plantà oz ses mailer a Sagogn.

Postinas, vendiders, scrinarias, il persunal da tgira e blers auters: nundumbraivlas persunas s'engaschan en moda speziala per auters umans durant il temp da corona. Dapi il cumenzament da la crisa da corona la primavaira 2020 han ellas ed els tuttenina da far bler dapli, ston far regularmain sururas e furneschan tuttina prestaziuns da record.

Eroxas ed eroxs grischuns secrets
Tar questas eroxas e quests eroxs secrets durant il temp da corona tutga per exempel er la vendidra Judith Schnider che ha – cun ses negozi dal vitg a Laax – provedì cunzunt durant il lockdown il mez vitg cun victualias. In tal erox è er il tgirunz Ram Das che presta lavur indispensabla en ina gruppa d'abitar per persunas cun impediments corporals u cun blessuras dal tscharvè a Cuira. Spezialmain durant quests dis n'èn umans sco Judith Schnider u Ram Das strusch da remplazzar.

Dus mailers per la generalitad
Sco represchentants da tut las eroxas e tut ils eroxs da corona en il Grischun han Judith Schnider e Ram Das survegnì da la presidenta da la Confederaziun Simonetta Sommaruga in pitschen mailer en il rom d'ina ceremonia d'undrientscha sin il prà dal Rütli. Mintga delegaziun chantunala ha lura pudì decider sezza, nua ch'il mailer duai vegnir plazzà pli tard. Judith Schnider e Ram Das èn sa decidids da surdar il mailer al chantun Grischun, per che questa planta survegnia in lieu per la generalitad. En il fratemp ha la presidenta da la Confederaziun surdà a la delegaziun er anc in grond mailer. Er quel è vegnì dà vinavant al chantun.

Diversitad: I dovra mintgina e mintgin!
Suenter intgins scleriments èn il president da la Regenza Christian Rathgeb ed Urban Maissen, manader da l'Uffizi da guaud e privels da la natira, sa decidids per Sagogn sco lieu da plantaziun. La zona da pumers da Sagogn è unica ord vista da la biodiversitad. Var 500 pumers datti a Sagogn ed enturn Sagogn – tranter quels 40 sorts maila, 19 sorts paira ed 8 sorts primblas. Quests curtins da pumers multifars – che flureschan magnificamain la primavaira – vegnan abitads da bleras spezias d'animals, sco utschels, utschels-mezmieur, pitschens mammals ed insects. Ultra da la gronda valur ecologica caracterisescha la zona da pumers er il maletg dal vitg: Sagogn na fiss betg imaginabel senza pumers. Gist uschia sco quai che la crisa actuala na fiss betg imaginabla senza las eroxas ed ils eroxs da corona. Ils dus mailers simboliseschan l'engaschament spezial dals conumans per nossa societad. Plantads vegnan ils mailers sin la parcella da la plaiv evangelica da Sagogn. Er la Baselgia stat per solidaritad tranter ils conumans. Uschia na po nagut pli impedir la buna creschientscha dals mailers.

Fotografias agiuntadas:

da sanestra: Christian Rathgeb, Annalisa Candrian, Hans Peter Casutt, Judith Schnider, Urban Maissen, Ram Das

Infurmaziuns:
- president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch
- Urban Maissen, Amselvicultur chantunal, Uffizi da guaud e privels da la natira, tel. +41 81 257 38 61, e-mail Urban.Maissen@awn.gr.ch

Gremi: Uffizi da guaud e privels da la natira
Funtauna: rg Uffizi da guaud e privels da la natira