La Regenza ha elegì Barbara Heller e prof. dr. Michèle F. Sutter-Rüdisser da nov en il cussegl da la Banca chantunala grischuna. Ultra da quai ha ella nominà il cusseglier da banca vertent dr. Christoph Caviezel sco vicepresident da la banca.

Tenor la Lescha davart la Banca chantunala grischuna (BCG) è la Regenza cumpetenta per eleger il cussegl da banca che sa cumpona da set persunas. Ils 31 da mars 2021 terminescha la perioda d'uffizi dal vicepresident da la banca Christian Thöny che ha alura cuntanschì il temp d'uffizi maximal da 12 onns e che vegn a bandunar il cussegl da banca. Ultra da quai datti dapi in mez onn ina vacanza en il cussegl da banca. Pia ha la Regenza stuì occupar il vicepresidi da la banca ed eleger dus commembers novs dal cussegl da banca.

La funcziun dal vicepresident da la banca surpiglia da nov il cusseglier da banca en uffizi dr. Christoph Caviezel per il rest da sia perioda d'uffizi fin ils 31 da mars 2023. Il giurist ed expert d'immobiglias viva a Laax ed è dapi 6 onns commember dal cussegl da banca.

Las novas en il cussegl da banca
Da nov ha la Regenza elegì Barbara Heller e prof. dr. Michèle F. Sutter-Rüdisser en il cussegl da banca. Michèle F. Sutter-Rüdisser ha 41 onns ed ha studegià scienzas economicas. Dapi l'onn 2018 è ella professuressa titulara a l'Universitad da Son Gagl. Ella ha enconuschientschas fundadas en il sectur da prestaziuns da servetschs finanzials ed experientschas pli profundas dals fatgs da controlling e da contabilitad. Ella occupa differents mandants en gremis directivs ed en gremis d'experts. Dunna Sutter-Rüdisser è creschida si ad Arosa e viva oz a Turitg. Ella cumenza ses uffizi il 1. da schaner 2021.

Barbara Heller ha 53 onns ed ha studegià scienzas economicas e politicas. Ella ha lavurà en la branscha da finanzas e da farma en posiziuns directivas durant circa dus decennis. Oz maina ella sia atgna interpresa che porscha servetschs en il sectur da la corporate governance. Ella ha enconuschientschas fundadas da la branscha da finanzas ed experientschas pli profundas en la gestiun ed en la cussegliaziun d'interpresas. Barbara Heller è titulara da differents mandats en gremis directivs ed en gremis d'experts. Ella viva a San Murezzan. Ella cumenza ses uffizi il 1. d'avrigl 2021.

Il cussegl da la Banca chantunala grischuna da set persunas vegn puspè ad esser cumplet il 1. d'avrigl 2021 e sa cumpona da trais dunnas e da quatter umens. Las elecziuns en il cussegl da banca han lieu resguardond las prescripziuns da l'Autoritad federala per la surveglianza dals martgads da finanzas (FINMA) ed il profil d'exigenzas da la Regenza per il cussegl da banca.

Fotografias:

 

Barbara Heller