Cun la midada da l'urari dals 13 da december 2020 vegn la purschida da viafier e da bus en il chantun Grischun adattada anc meglier als basegns da la clientella. Sin l'InterCity 3 Turitg – Cuira vegn purschì da nov in tact da mes'ura durant las uras da gronda frequenza. La Viafier retica procura per colliaziuns directas correspundentas e porscha durant la stagiun d'enviern dapli colliaziuns vers las destinaziuns turisticas Arosa, Tavau e San Murezzan. Er en il sectur dals bus datti novas purschidas.

Davent da Turitg vegn purschida a las 22.38 e davent da Cuira a las 21.08 mintgamai ina nova colliaziun quotidiana supplementara da l'InterCity. In nov InterCity che cursescha mintga di a las 17.37 da Cuira a Turitg cumplettescha la saira il tact da mes'ura dals InterCitys durant il temp da grond traffic. Las fins d'emna, en spezial durant la stagiun auta d'enviern, vegnan purschids ulteriurs InterCitys 3. Uschia vegn realisà in tact da mes'ura quasi permanent per il viadi da Turitg fin en las destinaziuns da vacanzas las pli enconuschentas dal Grischun. Durant la stagiun auta da sport d'enviern cursescha ultra da quai da nov il venderdi saira in tren a las 16.11 da Berna fin a Cuira. Per quest viadi na ston ins betg midar tren.

Ils onns 2021 e 2022 vegn sanà il tunnel dal Bommerstein sper il Lai Rivaun, cun la consequenza ch'ils temps da viadi dals trens da las Viafiers federalas vegnan adattads levamain. Per tschertas colliaziuns restass perquai memia pauc temp, per che las midadas funcziunian en moda fidabla e per che las colliaziuns possian vegnir publitgadas. Per pendularias e pendularis regulars duessan intginas da questas chadainas da transport etablidas funcziunar er vinavant.

Viafier retica: purschidas supplementaras sin l'entira rait
Davent da Glion vegn purschida ils lavurdis a las 05.24 ina nova colliaziun da baud che permetta da prender a Cuira l'InterCity da las 06.08 per Turitg. Sin il traject Landquart – Claustra – Tavau cursescha da nov mintga saira in tren da tard che parta a las 23.55 da Landquart. Uschia po la clientella dal Partenz e da Tavau profitar dal nov InterCity da tard davent da la staziun principala Turitg. Durant las fins d'emna da la stagiun d'enviern e da stad curseschan da nov trens supplementars nonstop sin la lingia d'Arosa. Durant las fins d'emna vegn augmentada la purschida da l'urari tranter Landquart e Tavau resp. San Murezzan. Tranter Cuira e Tusaun vegn armonisà l'urari da la lingia 2 da la viafier S la saira tard e cumplettà cun in tren da tard. Quel parta a las 00.01 da Cuira e funghescha sco colliaziun da l'InterCity da tard. Suenter las 22.00 daventa uschia il viadi davent da la staziun principala Turitg p.ex. fin Domat u en la Tumleastga 45 minutas pli svelt. Tranter Cuira e Landquart vegn il tact augmentà la saira al tact da mes'ura grazia a colliaziuns da bus supplementaras. Da quest augment profita la clientella dad Igis, Zizers e Trimmis.

Extensiun da la purschida er sin la rait da bus
Sin las lingias Cuira – Landquart sco er Cuira – Razén vegn augmentada la purschida da la saira. Vischnancas d'aglomeraziun pli grondas profitan dal tact da mes'ura fin las 23.00. La purschida da l'urari vers Pany / St. Antönien vegn augmentada e las lingias da bus vegnan prolungadas fin en ils abitadis periferics. Curs supplementars survegnan er las lingias da l'auto da posta Scuol – Martina, San Murezzan – Malögia, Andeer – Vargistagn, Casti – Savognin, en Val Stussavgia, sur il Pass dal Fuorn, Glion – Sursaissa, Cuira – Passugg, Lai – Zorten e Cuira – Laax. Tranter Lai e Tavau cursescha in nov bus da notg sur Casti. En l'Engiadin'Ota vegn da nov collià il territori Cho d'Punt ed amplifitgada la rait da la saira e da la notg.

En il Mesauc sco er sin la lingia Cuira – San Bernardin – Bellinzona ha lieu ils 5 d'avrigl 2021 ina midada da l'urari amez l'onn, perquai ch'il concept da viafier S dal Tessin vegn mess en funcziun pli tard che previs. Sin la lingia da l'auto da posta Cuira – Bellinzona stat a disposiziun a partir da lura la purschida attractiva e permanenta dal tact d'ina ura. Curs da bus pli svelts circuleschan mintga duas uras e porschan colliaziuns perfetgas als EuroCitys Bellinzona – Milaun sco er a las destinaziuns Lugano e Locarno. Novs curs durant las uras marginalas dal di porschan pussaivladads supplementaras per viagiar.

In'amplificaziun datti er sin la lingia regiunala Mesauc – Castione-Arbedo, nua ch'ils bus curseschan da nov da glindesdi fin sonda en il tact da mes'ura permanent. Ordaifer las uras da grond traffic finescha questa lingia da bus da nov a Castione empè da Bellinzona e porscha bunas colliaziuns als trens da la viafier S (TILO) per Bellinzona/Lugano.

Il Grischun s'avischina a Milaun ed a Minca
Grazia a l'avertura dal tunnel da basa dal Ceneri sa reducescha il temp da viadi da Bellinzona a Lugano ed a Milaun per 15 fin 20 minutas. A medem temp vegn augmentada la purschida da Bellinzona a Milaun. Las colliaziuns dal Grischun e per il Grischun vegnan garantidas a Bellinzona. Il Grischun profita plinavant da temps da viadi pli curts e d'ina duplicaziun da las colliaziuns en il territori da Minca grazia a differentas adattaziuns architectonicas e tecnicas vi da la rait da viafier tudestga. Il temp da viadi da Cuira a Minca sa reducescha da 4 uras e 35 minutas a 3 uras e 53 minutas. Cun fin set colliaziuns quotidianas datti da princip mintga duas uras ina pussaivladad da viagiar a Minca. Là datti colliaziuns cun ils svelts trens ICE per Nürnberg, Leipzig e Berlin.

Infurmaziuns pli detagliadas davart las midadas sin las singulas lingias da viafier e da bus
Er sin auters trajects da viafier e da bus èn vegnidas introducidas colliaziuns supplementaras dal traffic public. Las purschidas detagliadas da l'urari da mintga lingia chattais Vus en l'agiunta sco er en l'internet sut www.fahrplanfelder.ch.

Agiunta:
- Midadas da l'urari 2021 en il Grischun

Infurmaziuns:
- Thomas Schmid, manader da l'Uffizi d'energia e da traffic, tel. +41 81 257 36 21, e-mail Thomas.Schmid@aev.gr.ch
- Daniel Caduff, manader da project per il traffic public, Uffizi d'energia e da traffic, tel. +41 81 257 36 27, e-mail Daniel.Caduff@aev.gr.ch

Gremi: Uffizi d'energia e da traffic
Funtauna: rg Uffizi d'energia e da traffic