L'onn 2002 ha il chantun Grischun surdà la distribuziun dals meds d'instrucziun per las scolas popularas ad in purschider extern. Il contract cun il partenari da distribuziun actual scada la fin da l'onn 2021. Quest fatg ha la Regenza prendì sco motiv per metter en dumonda las structuras dals Meds d'instrucziun dal Grischun. Ella ha concludì da reorganisar per l'onn 2022 la distribuziun dals meds d'instrucziun en il chantun Grischun.

Meds d'instrucziun dal Grischun s'occupa sco chasa editura d'atgnas producziuns e venda vinavant er meds d'instrucziun d'autras chasas edituras. Il sortiment cumpiglia actualmain circa 650 atgnas producziuns e var 1360 artitgels d'autras chasas edituras. Ils fatgs d'empustaziun e da contabilitad, il deposit e la spediziun da tut ils artitgels sco er la cussegliaziun en connex cun ils meds d'instrucziun vegnan exequids dapi l'onn 2002 d'in post extern.

Concentraziun sin atgnas producziuns
En vista a la submissiun planisada ed a la nova surdada dal contract da furniziun ha la Regenza concludì da reorganisar la furniziun e da desister en l'avegnir da la revendita da meds d'instrucziun d'autras chasas edituras. Ils gudogns dal chantun or da la revendita èn sa reducids cuntinuadamain ils ultims onns, mintgatant ha la fatschenta schizunt fatg deficit.
L'onn 2007 èn vegnids abolids ils pretschs fixs per cudeschs e la fin da l'onn 2019 l'uschenumnà pretsch da scola tar las chasas edituras chantunalas per meds d'instrucziun. Quai ha chaschunà ina situaziun da concurrenza che sa mussa ussa pli e pli en differents models da pretsch e da rabat da las chasas edituras e dals revendiders. Grazia a quai e grazia als webshops da las chasas edituras che stattan a disposiziun da tut temp han las scolas e las persunas d'instrucziun pli e pli la pussaivladad da cumparegliar ils pretschs dals meds d'instrucziun e da cumprar il material d'instrucziun a las cundiziuns las pli favuraivlas.
A Meds d'instrucziun dal Grischun mancan las premissas ed ina incumbensa legala per sa mover en la concurrenza averta dal commerzi da cudeschs ed uschia per concurrenzar purschiders privats.
Pervia da quai vegn Meds d'instrucziun dal Grischun en l'avegnir a sa concentrar sin la distribuziun dals meds d'instrucziun d'atgna producziun.

Focus sin l'administraziun interna
Ensemen cun la reorganisaziun vegn optimada l'administraziun da las materialias d'instrucziun che vegnan edidas da la chasa editura Meds d'instrucziun dal Grischun. Igl è previs che l'Uffizi per la scola populara ed il sport (USS) surpiglia a partir da l'onn 2022 puspè sez l'entira administraziun dal sortiment reducì, las empustaziuns dals meds d'instrucziun, la tgira dal webshop ed er la cussegliaziun en connex cun ils meds d'instrucziun. Uschia vegn la cussegliaziun purschida là, nua che las enconuschientschas spezialas necessarias èn avant maun.
Davent da quel mument vegn il chantun a duvrar in purschider extern mo pli per ils secturs deposit e spediziun. Questa incumbensa vegn publitgada uffizialmain ils proxims mais.

Mediateca empè d'exposiziun dals meds d'instrucziun
Pervia dal sortiment fitg reducì vegni desistì a partir da l'onn 2022 d'ina exposiziun permanenta dals meds d'instrucziun. Las persunas d'instrucziun vegnan renviadas empè da quai ad instituziuns sco la mediateca da la Scola auta da pedagogia dal Grischun a Cuira, nua ch'ina schelta bler pli vasta da materialias d'instrucziun po vegnir consultada ed emprestada.

Infurmaziuns:
Josy Marie Künzler, manadra dal sectur Meds d'instrucziun, Uffizi per la scola populara ed il sport, tel. +41 81 257 22 61, e‑mail Josy.Kuenzler@avs.gr.ch

Gremi: Uffizi per la scola populara ed il sport
Funtauna: rg Uffizi per la scola populara ed il sport