Las lavurs da reparaziun dal convict a Cuira èn terminadas. Ils 25 d'october 2020 ha puspè recumenzà il manaschi a l'Arosastrasse 32.

Il convict, che vegn manà da l'Uffizi per la furmaziun media-superiura, è ina instituziun pedagogica impurtanta per gimnasiastas e gimnasiasts da las valladas dal Grischun che han tschernì Cuira resp. la Scola chantunala grischuna sco lieu da scolaziun. Il convict porscha a var 100 abitantas ed abitants in segund dachasa. Là vegnan ellas ed els tgirads en moda professiunala ed integrads en la concepziun dal mintgadi dal convict. Las scolaras ed ils scolars profitan er d'ina purschida da temp liber raschunaivla. Latiers tutga in'assistenza durant 24 uras da dumengia fin venderdi.

Renovaziun suenter 50 onns
Il convict è in dals edifizis ils pli marcants da la citad da Cuira. El è situà sin la spunda tranter la via veglia dal Scanvetg e la via per Arosa, directamain sur il campus da la scola chantunala grischuna. L'edifizi da l'architect Otto Glaus è vegnì construì l'onn 1968 e tutga tar ils edifizis extraordinarias dal modernissem suenter la guerra en il Grischun. La valur architectonic-culturala da la chasa da dimora è impurtanta, ed ella è – sco perditga dal temp da sia concepziun sco er pervia da sia forza ed expressiun sco construcziun da betun natiral – degna da vegnir mantegnida. Suenter 50 onns ha l'edifizi demussà in grond basegn da renovaziun, tant dadens sco er dadora. Il standard antiquà ha pretendì ina renovaziun cumplessiva. Sin basa d'ina concurrenza per prestaziuns totalas è vegnì incumbensà il team enturn l'interpresa generala Implenia Svizra SA cun la realisaziun. Il project general inclusiv il provisori ha custà 31 milliuns francs.

Qualitad veglia en nova pumpa
Cun la renovaziun vegni garantì che l'edifizi possia vegnir duvrà per ulteriurs decennis. Grazia ad ina planisaziun premurusa e grazia a l'accumpagnament da la Tgira da monuments ha l'edifizi pudì vegnir modernisà ed adattà a las pretensiuns dad oz. Il project general ha cumpiglià la renovaziun e la reparatura da las fatschadas, il remplazzament da l'entira tecnica da chasa, la renovaziun da las construcziuns a l'interiur e l'adattaziun da las infrastructuras a las pretensiuns legalas vertentas en differents secturs. L'adattaziun la pli gronda areguard il spazi ed areguard l'infrastructura ha gì lieu en la cuschina. Profitond da sinergias tranter la mensa da la Scola chantunala ed il convict ha l'infrastructura da la cuschina pudì vegnir reducida fermamain. L'edifizi sa preschenta en nova pumpa, ha dentant mantegnì l'auta qualitad dals spazis interns ed externs.

Emprima notg en il convict
Per la fasa da la sanaziun architectonica era vegnì construì in alloschi provisoric sin l'areal al vest da la chasa da scola Cleric. Il manaschi era vegnì excorporà per l'entira durada da la sanaziun. Suenter in temp da planisaziun e da construcziun da stgars 3 onns ha il convict sanà puspè pudì vegnir retratg mez october da quest onn. Ils 25 d'october han las abitantas ed ils abitants passentà lur emprima notg en il convict gist renovà.

Actualmain vegnan anc terminadas las lavurs da conturn. La festa d'inauguraziun uffiziala è previsa per la primavaira 2021.

Fotografias agiuntadas:

©Ingo Rasp

Foto 3

Infurmaziuns:
- cusseglier guvernativ dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- Markus Dünner, architect chantunal, Uffizi da construcziun auta, tel. +41 81 257 36 31, e-mail Markus.Duenner@hba.gr.ch

Gremi: Departament d'infrastructura, energia e mobilitad
Funtauna: rg Departament d'infrastructura, energia e mobilitad