4249 persunas èn laschadas sa testar il venderdi en las staziuns da test da las vals dal Grischun dal Sid. Da quellas han 38 tests mussà in resultat positiv. Per ils emprims tests territorials en Svizra èn entradas fin ussa 11'325 annunzias. L'emprim di da test è passà per gronda part senza problems; qua u là hai dà in retardament tar la communicaziun dal resultat dal test. Als 23 lieus da test stattan passa 1000 persunas en acziun da venderdi fin dumengia. Annunzias pon vinavant vegnir fatgas fin a la fin da l'acziun. Ina gronda participaziun gida a distgargiar ils fatgs da sanadad e l'economia.

Oz venderdi èn vegnids fatgs tests en 9 da 19 vischnancas dal Grischun dal Sid; en vischnancas pli pitschnas avran las vias da test pir la sonda en damaun. Entaifer 2 dis han las vischnancas installà – cun il sustegn da la Protecziun civila – tut en tut 177 lingias da test en 23 lieus da test. En quels lavuran tranter venderdi e dumengia 60 medias e medias, ultra da quai persunal medicinal (354 persunas) ed administrativ (444 persunas). Per mintga lingia da tests stat a disposiziun persunal che guarda ch'i na dettia betg fullas da glieud.

Mintga resultat gida a survegnir en maun la pandemia
Ils tests territorials en il Grischun dal Sid pussibiliteschan da chattar persunas che portan il virus en sai, ma che n'han nagins sintoms u che han mo sintoms mo fitg levs (persunas asintomaticas). Uschia gida mintga resultat positiv d'in test a franar vinavant la pandemia. Il project da pilot furnescha ultra da quai enconuschientschas impurtantas per la logistica, per la tecnica e per il proceder en connex cun strategias da test da gronda dimensiun.

Distgargiar ils fatgs da sanadad e l'economia
En il chantun Grischun èn actualmain registrads 853 cas da corona activs. 1074 persunas eran il venderdi en quarantina. Ils dumbers da cas en il chantun èn sin in nivel constantamain aut. Pervia da quai ha la Regenza decidì ils 4 da december 2020 da prender mesiras pli rigurusas. Ils restaurants ston restar serrads fin ils 18 da december 2020, ultra da quai èn vegnidas decretadas restricziuns tar las activitads da temp liber. Il Cussegl federal ha relaschà ulteriuras directivas il venderdi, en spezial per la gastronomia. Pervia da quai èsi in punct central per il Grischun da rumper la dinamica negativa dals dumbers da cas. Mo uschia èsi pussaivel d'avrir puspè ils restaurants ed ils museums e da permetter eveniments culturals.

L'Uffizi da sanadad, ils ospitals regiunals e las vischnancas appelleschan vinavant a la populaziun dal Grischun dal Sid da s'annunziar per il test. Fin e cun dumengia è quai pussaivel sut www.gr.ch/corona-test.

Fotografias:

Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Gremi: Uffizi da sanadad
Funtauna: rg Departament da giustia, segirezza e sanadad