La missiva supplementara cumplettescha la missiva da la Regenza concernent l'adattaziun dal sistem electoral dal Cussegl grond. Ella cuntegna in project da revisiun formulà per realisar l'uschenumnà model C (sistem da proporz dubel en la relaziun tranter il chantun ed ils 39 circuls electorals vertents). Qua tras ademplescha la Regenza ina incumbensa che la Cumissiun per politica da stadi e strategia l'aveva dada en il rom d'in conclus da refusaziun.

La missiva da la Regenza dals 24 d'avust 2020 al Cussegl grond s'occupa dal model E, in sistem maschadà da maiorz e da proporz en 43 circuls electorals. Il model E aveva survegnì la pli gronda accoglientscha en la consultaziun. En vista ad ina vasta analisa da la dumonda davart il sistem electoral ha la Cumissiun per politica da stadi e strategia (CPSS) pretendì ch'i vegnia er mussà, co ch'il model C – in sistem da proporz dubel en ils 39 circuls electorals vertents – vegniss concepì pli detagliadamain. En la consultaziun aveva er quest model chattà in ferm sustegn.

Princips dal model C
Cun il model C vegn il Cussegl grond elegì tenor il sistem electoral da proporz (dubel) (metoda da divisurs proporziunals dubels cun arrundaziun da standard = "Pukelsheim dubel"). Il "Pukelsheim dubel" garantescha in dubel grad da proporziunalitad. Ils sezs vegnan attribuids uschia, che las partidas survegnan d'ina vart en l'entir territori chantunal sezs en proporziun da lur quota da votantas e votants (attribuziun superiura) e ch'ellas vegnan da l'autra vart represchentadas en proporziun dals dumbers d'abitantas ed abitants (sutattribuziun). Sco circuls electorals pon vegnir surpigliads ils 39 circuls electorals vertents. Las elecziuns han lieu cun glistas. Elegiblas èn mo persunas che figureschan sin ina glista dal circul electoral correspundent.

Il project prevesa in quorum legal sin plaun chantunal, quai vul dir ina procentuala (quota) d'electuras ed electurs da 3 pertschient che sto vegnir cuntanschida, per ch'ina partida possia sa participar a la repartiziun dals sezs. Uschia poi vegnir garantì che l'abilitad d'agir e l'effizienza dal Cussegl grond na vegnissan betg restrenschidas, perquai che numerusas gruppaziuns fitg pitschnas faschessan part dal Cussegl grond. Previsa è plinavant in'uschenumnada cundiziun da maiorz. Tenor questa cundiziun survegn la glista (partida) cun las pli bleras vuschs almain in sez en mintga circul electoral, sche la partida ha il dretg d'in tal sez tenor l'attribuziun superiura (sin plaun chantunal). Betg previsas n'èn colliaziuns da glistas.

Il project formulà en la missiva supplementara cumpiglia ina revisiun parziala da la Constituziun chantunala ed il relasch d'ina Lescha davart l'elecziun dal Cussegl grond.

Tenuta da la Regenza
Tras la deliberaziun da la missiva supplementara tar il model C ha la Regenza ademplì ina incumbensa correspundenta da la CPSS. Quest model – che la Regenza aveva favurisà en ses rapport da consultaziun – n'ha enconuschentamain betg chattà il vast sustegn necessari en la consultaziun. Pervia da questas circumstanzas politicas realas e resguardond las relaziuns da maioritad en il Cussegl grond ha la Regenza damai preschentà ina missiva cun in project per realisar il model E. Vi dal fatg che la Regenza valitescha anc adina il model C sco "model da cumpromiss" – che purschess la pussaivladad da terminar la lunga discussiun politica davart il dretg sistem electoral per il Cussegl grond – n'è sa midà nagut.

Agiuntas:
- missiva supplementara
- missiva dals 24 d'avust 2020

Infurmaziuns:
president da la Regenza dr. Christian Rathgeb, schef dal Departament da finanzas e vischnancas, tel. +41 81 257 32 01, e-mail Christian.Rathgeb@dfg.gr.ch

Gremi: Regenza
Funtauna: rg Chanzlia chantunala