La Regenza ha concedì ina contribuziun chantunala da 120 000 francs al Forum economic dal Grischun (WIFO GR) per ils onns 2021–2024. Il WIFO GR sa chapescha sco lavuratori da reflexiun classic. Cun sia vista independenta, surordinada e da l'economia publica duai el sa focussar er en il futur sin las pussaivladads da svilup per il Grischun. Ultra da lavurs da basa duain singulas ideas vegnir elavuradas en moda concreta per augmentar uschia la probabilitad da realisaziun. La collavuraziun cun federaziuns economicas e cun ulteriurs represchentants d'interess duai vegnir rinforzada. Cun extender ils chanals da communicaziun duain las infurmaziuns dal WIFO GR arrivar pli intenziunadamain tar las gruppas en mira respectivas. L'onn 2021 duain cuntinuar – sco prioritad – las lavurs en connex cun la pandemia dal coronavirus. Ulteriuras propostas dal program e dal concept per il proxim futur concernan la midada dal clima, las vias da pass da temp liber u l'examinaziun da mesiras fiscalas.

La Regenza ha approvà la revisiun parziala da la planisaziun locala che la vischnanca da Samignun aveva concludì ils 26 d'avust 2018. Cun questa revisiun parziala vegnan stgaffidas las premissas da la planisaziun d'utilisaziun per realisar ina loipa da passlung da Samignun-Vitg fin tar la basa forestala a Samignun-Laret. La vischnanca da Samignun vuless rinforzar il sport da passlung sco segunda pitga al sport da skis alpin. Oz ha ella mo duas loipas da passlung che n'èn betg fitg lungas. Perquai ha la vischnanca l'intenziun da realisar ina nova loipa da passlung da la "vart da la sumbriva" tranter Samignun-Vitg e Samignun-Laret (basa forestala) sin ina lunghezza da circa 3,5 kilometers. Questa loipa po vegnir duvrada er cun pauca naiv dal cumenzament da la stagiun d'enviern fin la primavaira ed è ina purschida attractiva d'ina loipa da var 7 kilometers.

©Uffizi federal da topografia

La Regenza ha approvà il plan directiv Parc-Ela-Trek ch'è vegnì concludì da la regiun Alvra ils 28 d'avust 2020. La finamira da quest plan è quella da construir ina senda da viandar a lunga distanza sin il stgalim alpin sut il num "Parc-Ela-Trek". La ruta cumpiglia tut en tut 18 etappas. Ella percurra sin las sendas da viandar ch'existan gia uschia che alloschis e manaschis d'alloschament existents èn integrads. I sa tracta d'in concept general ch'è vegnì sviluppà en stretga collavuraziun cun las corporaziuns d'alp e cun las vischnancas da domicil. La determinaziun en il plan directiv regiunal serva a garantir la coordinaziun territoriala ed a stgaffir las premissas dal dretg da planisaziun per realisar il project en la procedura per la permissiun da construcziun.

©Uffizi federal da topografia