La Regenza ha nominà Christian Tannò sco nov secretari dal Departament d'infrastructura, energia e mobilitad. El vegn a surpigliar questa funcziun il 1. d'avrigl 2021.
Christian Tannò che ha 49 onns daventa il nov secretari dal Departament d'infrastructura, energia e mobilitad (DIEM) suttamess al president da la Regenza dr. Mario Cavigelli. El suonda Conradin Luzi che vegn a surpigliar ina nova sfida professiunala suenter in'activitad da circa 10 onns per il DIEM – bundant 3 onns da quels sco secretari dal departament.
Suenter la scola media commerziala a Samedan e suenter avair fatg la maturitad sin segunda via ha Christian Tannò ch'è creschì si ad Alvaschagn studegià giurisprudenza a l'Universitad da Turitg. Al Georgetown University Law Center, Washington D.C., ha el absolvì in segiurn da perscrutaziun sco er in studi supplementar che l'ha manà ad in diplom cun spezialisaziun sin dretg d'economia. Alura ha el promovì puspè a l'Universitad da Turitg cun ina dissertaziun davart fusiuns d'interpresas.
Suenter in'activitad da plirs onns en ils conturns universitars è Christian Tannò stà collavuratur giuridic en in pitschen biro d'advocatura cun ina vasta orientaziun sco er – en funcziun directiva – en in'advocatura d'economia a Turitg en il sectur da l'assistenza giudiziala internaziunala, da regulatory affairs e da compliance en il rom d'investigaziuns forensicas. L'ultim ha el manà – sco giurist d'interpresa – il servetsch giuridic d'ina interpresa mesauna da chemia ch'è activa sin plaun internaziunal.
Signur Tannò ch'è da lingua materna rumantscha e tudestga vul returnar, suenter plirs onns a Turitg, puspè en il Grischun. Sco secretari dal departament maina el il secretariat dal departament e sustegna il schef dal DIEM en tut las dumondas tematicas e gida a manar, ad organisar, a coordinar ed a controllar las fatschentas dal departament.
Fotografia agiuntada:
Nov secretari dal Departament d'infrastructura, energia e mobilitad Christian Tannò
Infurmaziuns:
president de la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e‑mail Mario.Cavigelli@diem.gr.ch
Gremi: Regenza
Funtauna: rg Regenza