Il concern da farmazia Pfizer n'è betg en cas da furnir sco planisà la quantitad gia empermessa da dosas dal vaccin cunter corona. Las stretgas tar la furniziun influenzeschan er il plan da vaccinaziun grischun.
Perquai ch'il concern da farmazia Pfizer n'è betg en cas – pervia d'adattaziuns en la firma da producziun belgia a Puurs (BEL) – da furnir sco planisà la quantitad da dosas dal vaccin cunter corona, ch'è gia empermessa en tut l'Europa, datti stretgas tar la furniziun. Da questa stretga è pertutgà er il Grischun. Da las 3000 dosas dal vaccin empermessas ha l'Uffizi da sanadad survegnì mo 1000 ils 18 da schaner 2021.
Retardament tar ils termins da vaccinaziun
Las segundas dosas per las persunas ch'èn gia vaccinadas en las chasas da persunas attempadas e da tgira èn garantidas. Ma la stretga tar la furniziun ha consequenzas per ils centers decentrals da vaccinaziun e da test. Uschia survegn il center da vaccinaziun a Cuira (Ospital da la Crusch) ussa – ultra dal vaccin da Pfizer – er il vaccin "COVID-19 Vaccine Moderna®". Pervia da quai stattan a disposiziun main dosas dal vaccin da Moderna en ils ulteriurs centers da vaccinaziun e da test e quai chaschuna ulteriurs retardaments tar ils termins da vaccinaziun.
Perquai ch'il vaccin è disponibel mo limitadamain, vegnan vaccinadas tenor las recumandaziuns da la Cumissiun federala per vaccinaziuns exclusivamain las persunas da tschertas gruppas en mira. Per entant èn quai las persunas sur 75 onns sco er las persunas creschidas cun grevas malsognas cronicas.
Vaccinaziun a partir da la fin da schaner
Tut tenor la disponibladad dal vaccin vegnan vaccinadas las gruppas en mira menziunadas, suenter ch'ellas èn vegnidas registradas, a partir da la fin da schaner en ils ospitals regiunals da Tavau, da Glion, da Puschlav, da Schiers, da Scuol e da Tusaun sco er en ils centers a Cama, a Cuira (Ospital da la Crusch) ed a San Murezzan. Las cussegliaziuns da vaccinaziun tutgan al champ da cumpetenza da las medias e dals medis da chasa. Ellas ed els vegnan a porscher pli tard er vaccinaziuns en lur praticas, sch'il vaccin correspundent è disponibel.
Ils termins da vaccinaziun vegnan attribuids e confermads dals centers da vaccinaziun suenter la registraziun; i n'è betg pussaivel da tscherner libramain in termin. La preannunzia po vegnir fatga online (www.gr.ch/impfung) u per telefon sur la hotline da vaccinaziun (telefon +41 81 254 16 00). Per la preannunzia online dovran ins la carta da l'assicuranza da malsauns sco er in numer da telefon.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: Uffizi da sanadad