La Cumissiun per politica da stadi e strategia dal Cussegl grond (CPSS) ha predeliberà la missiva sco er la missiva supplementara da la Regenza tar la "Adattaziun dal sistem electoral per il Cussegl grond". La maioritad da la cumissiun beneventa il model C (sistem electoral da proporz).
En tut en tut tschintg sesidas ha la CPSS predeliberà tant la missiva da la Regenza tar la "Adattaziun dal sistem electoral per il Cussegl grond" (model E, sistem electoral maschadà maiorz e proporz) sco er la missiva supplementara ch’era vegnida pretendida da la cumissiun (model C, sistem electoral da proporz "Pukelsheim dubel"). A las sesidas èn stads preschents er il cusseglier guvernativ Christian Rathgeb e represchentants da la Chanzlia chantunala. Suenter che la cumissiun era entrada gia ils 23 d'october 2020 unanimamain sin la fatschenta ed aveva returnà quella a la Regenza per la cumplettar, èn vegnids discutads detagliadamain ils dus models E e C en las quatter sesidas suandantas.
Maioritad da la cumissiun per il model C
Sin basa da la sentenzia dal Tribunal federal dals 29 da zercladur 2019 èsi necessari da midar il sistem electoral actual. Suenter che la Regenza aveva preferì il model C en la consultaziun, ha ella preschentà al Cussegl grond ina missiva per il model E, quai pervia da las relaziuns tranter las forzas politicas sco ch'ellas èn sa mussadas suenter l'evaluaziun da la consultaziun. En la CPSS èsi però sa mussà che la maioritad da la cumissiun beneventa il model C, quai suenter debattas intensivas e suenter ina consideraziun da tut ils avantatgs e dischavantatgs sco er en vista a l'iniziativa "Per la reducziun dal Cussegl grond – 90 bastan". La CPSS propona pia al Cussegl grond da suttametter a la votaziun dal pievel ina midada constituziunala a favur d'in sistem electoral da proporz. Ina minoritad da la cumissiun beneventa percunter il model E, pia in sistem electoral maschadà da proporz e maiorz.
Votaziun da variantas?
La cumissiun ha er discutà detagliadamain davart la dumonda, sch'i duain vegnir suttamess al pievel tuts dus models da sistems electorals en ina votaziun da variantas. La maioritad da la cumissiun, la quala beneventa il model C, propona al Cussegl grond da suttametter al pievel mo il model C per la votaziun. La minoritad da la cumissiun, la quala s'engascha a favur dal model E, è da l'avis ch'il pievel stoppia pudair tscherner tranter ils dus models en ina votaziun da variantas.
Questa fatschenta duai vegnir tractada en la sessiun da favrer 2021. La votaziun dal pievel pudess avair lieu ils 13 da zercladur 2021.
Infurmaziuns:
president da la cumissiun Maurizio Michael, tel. +41 79 798 90 92
Gremi: Cumissiun per politica da stadi e strategia
Funtauna: rg Cumissiun per politica da stadi e strategia