In'emna suenter il test da massa facultativ dal mardi passà a San Murezzan vegn testà il persunal da tut ils hotels a San Murezzan ed a Schlarigna sin il coronavirus. Sa laschar testar ston er tut las magistras e tut ils magisters da skis e da sport da naiv che lavuran sin ils territoris da skis Corviglia e Corvatsch. Questa analisa extendida è ina mesira da segirezza per prevegnir a novas infecziuns ed uschia ad interrupziuns dal manaschi. Exceptadas dals tests èn persunas che pon gia preschentar in test da PCR cun in resultat negativ sco er persunas ch'eran s'infectadas cumprovadamain cun COVID-19.
Perquai ch'ins aveva constatà l'emna passada ina derasaziun pli gronda dal coronavirus mutà en dus hotels a San Murezzan, aveva l'Uffizi da sanadad dal Grischun mess sut quarantina quests dus hotels ed ordinà in'analisa da l'erupziun sco er in test da massa per la populaziun da San Murezzan. Il test da massa ha mussà che la rata da positivitad importava en media 4 pertschient en ils dus hotels pertutgads ed 1 pertschient en la populaziun.
Il contact tracing ha analisà ils cas positivs. En quest connex han ins pudì constatar duas ulteriuras mutaziuns ed interrumper las chadainas d'infecziun. Perquai che las mutaziuns èn vegnidas localisadas svelt – quai ch'è stà pussaivel pir grazia al test da massa – han ins pudì evitar da serrar ulteriurs hotels respectivamain d'ordinar quarantinas per ulteriurs hotels. L'evaluaziun dals tests ha plinavant mussà ch'ils concepts da protecziun en ils hotels funcziunan.
Test extendì per hotels e per scolas da skis
UPer evitar duraivlamain ch'il virus mutà sa derasia, vegn realisà in test extendì per ils hotels e per las scolas da skis a San Murezzan ed a Schlarigna. Suenter il test da massa facultativ dal mardi ston ussa tut las collavuraturas e tut ils collavuraturs dals hotels a San Murezzan ed a Schlarigna far in test da PCR, e quai glindesdi, ils 25 da schaner 2021, u mardi, ils 26 da schaner 2021. Far in test da PCR ston plinavant tut las persunas che lavuran sin il territori da las vischnancas da San Murezzan e da Schlarigna respectivamain sin ils territoris da skis Corviglia e Corvatsch en scolas da skis/sport da naiv u sco magistras e magisters da skis/sport da naiv ubain che cumenzan cun questa lavur fin il pli tard il 1. da favrer 2021. Exceptadas dals tests dal glindesdi e dal mardi proxim èn persunas che pon preschentar in test da PCR cun in resultat negativ, fatg suenter ils 17 da schaner 2021, sco er persunas ch'eran s'infectadas cumprovadamain cun COVID-19 suenter ils 17 da november 2020. Persunas ch'èn sa participadas al test da massa dal mardi passà, na ston pia betg sa laschar testar anc ina giada.
Questa analisa extendida da l'erupziun serva ad impedir ch'il virus mutà sa derasia ulteriuramain suenter las erupziuns localas constatadas. Ils tests vegnan realisads en collavuraziun cun la vischnanca da San Murezzan, cun la vischnanca da Schlarigna, cun hotelleriesuisse San Murezzan e cun las scolas da skis da l'Engiadin'Ota.
Il chantun Grischun recumonda a tut las interpresas da laschar testar regularmain lur collavuraturas e lur collavuraturs sin il coronavirus. Per quest intent ha el lantschà in program da test per interpresas. Quest program cumenza cun sia activitad l'entschatta da favrer.
Ils resultats da l'evaluaziun na vegnan betg ad esser disponibels avant la mesemna saira dals 27 da schaner 2021.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: Uffizi da sanadad