La Regenza ha concludì da nominar danovamain in cumissari da la Regenza per la vischnanca da Roveredo. Suenter ch'ina mesira correspundenta tenor il dretg da surveglianza era vegnida disponida gia dal fanadur fin il settember 2020, cuntinuescha la crisa instituziunala entaifer l'autoritad executiva da Roveredo, uschia che la Regenza sto intervegnir anc ina giada. Sco cumissari da la Regenza vegn nominà l'anteriur cusseglier guvernativ Claudio Lardi.
En la vischnanca da Roveredo datti dapi onns adina puspè difficultads instituziunalas. Gia il schaner 2013 aveva la Regenza perquai nominà in cumissari da la Regenza. Er sch'i n'ha dà suenter fin l'onn passà nagins causals che avessan pretendì ina intervenziun formala da la Regenza tenor il dretg da surveglianza, è la lavur entaifer las autoritads stada caracterisada da dispitas politicas e persunalas. La situaziun chargiada suenter las elecziuns da la suprastanza per la perioda d'uffizi 2019–2022 è stada il motiv per la Regenza da nominar ina cumissaria da la Regenza per il temp dal fanadur fin la fin da settember 2020.
Nova escalaziun en la suprastanza sforza d'agir
Ils novs svilups mussan che la vischnanca da Roveredo n'ha displaschaivlamain betg anc chattà la via enavos a relaziuns ordinadas e stabilas. Las differentas inoltraziuns al chantun reveleschan che la collavuraziun en la cumposiziun actuala da la suprastanza n'è betg pussaivla u è almain fitg engrevgiada.
Represchentantas e represchentants da l'Uffizi da vischnancas (UV) èn sa scuntrads ils 10 da december 2020 cun ils singuls commembers da la suprastanza sco er – suenter ils discurs individuals – cun l'entira suprastanza per ina discussiun a Roveredo. Igl è sa mussà che la relaziun tranter ils commembers da la suprastanza ed il president communal è engrevgiada fermamain. I manca evidentamain in minimum da confidenza vicendaivla respectivamain da respect ed in'autoritad colleghiala che funcziuna.
La Regenza ha examinà differentas variantas
Sco mesiras da surveglianza stattan en il center la destituziun da l'uffizi, la nominaziun d'ina cumissaria u d'in cumissari da la Regenza ubain la curatella. La Regenza ha examinà detagliadamain tut las variantas. Er sche ni la destituziun da l'uffizi ni la curatella n'èn definitivamain exclusas, arriva la Regenza a la conclusiun ch'igl è inditgà per il mument da nominar danovamain in cumissari da la Regenza.
Sco cumissari da la Regenza vegn nominà lic. iur. Claudio Lardi, advocat, Cuira, anteriur cusseglier guvernativ dal chantun Grischun. Il mandat vala per immediat ed è limità fin la fin da la perioda da legislatura 2019–2022. Sin basa dals rapports regulars decida la Regenza davart eventualas adattaziuns da las mesiras.
La pussanza suprema da decider resta tar ils commembers da la suprastanza elegids
Il cumissari da la Regenza surpiglia las incumbensas e las funcziuns formalas dal president communal e maina l'administraziun communala. Ils commembers da la suprastanza elegids restan dentant en uffizi e mantegnan lur dretg da votar. Il cumissari da la Regenza po cundecider mo, sche la suprastanza n'è betg preschenta cumplettamain u sch'in commember sto prender recusaziun. En quest cas dispona el dal dumber da vuschs mancantas. Plinavant ha il cumissari da la Regenza la cumpetenza da dar directivas, sch'ils commembers da la suprastanza n'observan betg las reglas d'in cumportament interuman ordinà e correct.
Sche la suprastanza perda sia abilitad d'agir pervia da demissiuns, daventa la funcziun dal cumissari da la Regenza – senza autras intervenziuns e per in temp limità – l'uffizi dal curatur.
Tut las mesiras concernan sulettamain il plaun da l'executiva.
Displaschair e speranza
La Regenza deplorescha ch'ella sto danovamain intervegnir sin basa dal dretg da surveglianza en ils fatgs ed en l'autonomia da la vischnanca da Roveredo. A medem temp ha ella la speranza che quest pass saja ussa er in clom da resvegl da daventar pli conscient da la responsabladad instituziunala per la vischnanca en sia totalitad. La Regenza parta dal fatg ch'ils commembers da la suprastanza elegids sajan conscients da lur responsabladad statalpolitica, sociala e persunala envers lur mandat e pia envers la populaziun da Roveredo. La soluziun sin mesira sin basa dal dretg da surveglianza tegna quint da tut ils fatgs che ston vegnir resguardads.
Infurmaziuns:
- Cusseglier guvernativ dr. Christian Rathgeb, schef dal Departament da finanzas e vischnancas, tel +41 81 257 32 01, e-mail Christian.Rathgeb@dfg.gr.ch
- Thomas Kollegger, manader da l'Uffizi da vischnancas, tel. +41 81 257 23 81, e-mail Thomas.Kollegger@afg.gr.ch
Gremi: Regenza
Funtauna: rg Uffizi da vischnancas