Tar il persunal dals hotels a San Murezzan ed a Schlarigna e tar las magistras ed ils magisters da skis e da sport da naiv da l'Engiadin'Ota è la rata da positivitad eruida a chaschun dals tests sin il coronavirus pli bassa che en la populaziun generala. A chaschun d'ina analisa pli extendida tar 1923 persunas hai dà mo 15 resultats positivs dal test.

Glindesdi e mardi passà èn sa participadas ulteriuras 1923 persunas al test dal coronavirus organisà da l'Engiadin'Ota. L'Uffizi da sanadad dal Grischun aveva supplitgà las collavuraturas ed ils collavuraturs da tut ils hotels da San Murezzan e da Schlarigna sco er tut las magistras e tut ils magisters da skis e da sport da naiv, che lavuran en ils territoris da skis Corviglia e Corvatsch, da sa laschar testar. 15 persunas han gì in resultat positiv dal test sin il coronavirus, 3 da quellas cun la mutaziun dal virus (B.1.1.7). Tut las persunas cun in resultat positiv dal test n'avevan nagins sintoms da malsogna e na savevan perquai er betg ch'ellas pudessan infectar autras persunas. Ellas èn sa rendidas immediatamain en isolaziun.

Ils tests posteriurs èn vegnids fatgs sco mesira da segirezza, suenter ch'ina accumulaziun d'infecziuns era sa mussada l'emna passada a chaschun da tests da rutina en dus hotels da San Murezzan. Sinaquai èn ils dus hotels vegnids mess immediatamain sut quarantina e tut las collavuraturas e tut ils collavuraturs sco er tut ils giasts èn vegnids testads. Dus dis suenter èn vegnids fatgs a San Murezzan tests da massa per tut la populaziun. Entaifer ils dus hotels èn 4 pertschient dals tests stads positivs, en la populaziun 1 pertschient dals tests.

Cun ils tests finals en ils hotels e tar las magistras ed ils magisters da skis e da sport da naiv a San Murezzan ed a Schlarigna èn las acziuns da test en connex cun l'accumulaziun da cas menziunada qua survart vegnidas terminadas. Tut en tut èn vegnids fatgs 5655 tests. 82 chadainas da transmissiun han pudì vegnir interruttas, da quellas 34 cun mutaziuns dal virus.

Supplementarmain als tests a San Murezzan ed a Schlarigna han hotels a Puntraschigna, a Segl ed a Silvaplauna fatg – cun sustegn da las vischnancas – vasts tests tar lur persunal. A Puntraschigna ha ina da 415 persunas gì in resultat positiv dal test, a Segl n'han naginas da las 132 persunas testadas gì in resultat positiv. Ils tests a Segl ed a Silvaplauna vegnan anc cuntinuads il venderdi.

Effects positivs da la strategia da test activa
Grazia a la strategia da test activa cun quarantina han las accumulaziuns da cas en ils dus hotels pudì vegnir scuvridas baud e las persunas pertutgadas han pudì vegnir isoladas immediatamain. Ils tests posteriurs tar la populaziun, tar il persunal d'hotel e tar las magistras ed ils magisters da sport da naiv han mussà ch'il virus ch'è sa mussà en moda accumulada en ils hotels, n'ha betg pudì sa derasar en moda pli extensiva ordaifer ils manaschis. Quai mussa ch'ils concepts da protecziun dals manaschis e che la strategia da test dal chantun Grischun funcziuneschan cun success.

Dapi oz venderdi, ils 29 da schaner 2021, pon interpresas en il Grischun s'annunziar per tests en lur manaschis. Las collavuraturas ed ils collavuraturs vegnan lura interrogads e testads sistematicamain, quai vul dir tenor in profil da ristga individual, a partir dal cumenzament da favrer. Gia èn s'annunziadas var 200 interpresas cun passa 12 000 collavuraturas e collavuraturs.

Observar vinavant las reglas da distanza e d'igiena
L'Uffizi da sanadad regorda las abitantas, ils abitants ed ils giasts dal chantun instantamain da desister vinavant da tut ils contacts betg necessaris cun autras persunas e d'observar consequentamain las reglas da distanza e d'igiena vertentas. Per proteger ils conturns persunals vegni recumandà urgentamain da far in test dal coronavirus er en cas da sintoms mo levs.

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Funtauna: Uffizi da sanadad