Las scolas popularas grischunas èn bunas fin fitg bunas. Quai resulta dal rapport final chantunal pertutgant l'evaluaziun da tut las scolas popularas grischunas. L'Uffizi per la scola populara ed il sport ha evaluà tenor l'incumbensa legala tut las scolas regularas e spezialas durant ils onns 2015–2020. L'Inspecturat da scola cumpetent è cuntent cun ils resultats da l'evaluaziun.

L'Inspecturat da scola da l'Uffizi per la scola populara ed il sport (USS) ha evaluà tut en tut 129 unitads da scola tranter ils onns 2015 e 2020. Cun questa evaluaziun externa contribuescha l'Inspecturat da scola a l'egualitad da las schanzas ed al svilup sistematic da la scola. L'evaluaziun dal chantun cumplettescha il management da qualitad intern da las scolas cun ina vista professiunala externa.

Bun clima da scola cun scolaras e scolars cuntents
Il turnus d'evaluaziun 2015–2020 ha mussà che la gronda maioritad da las scolaras e dals scolars sco er dals geniturs expriman ina gronda cuntentientscha cun lur scola. L'atmosfera en las scolas grischunas è caracterisada d'ina gronda confidenza e stima. Ultra dal clima da scola è er la moda da las persunas d'instrucziun da manar ina classa ina premissa impurtanta per in emprender cun success. Dals resultats da l'evaluaziun resorta che las persunas d'instrucziun mainan lur classas en moda clera e consequenta e che uschia è garantida ina instrucziun per gronda part senza disturbis. L'instrucziun è structurada bain, las persunas d'instrucziun èn in exempel per las scolaras ed ils scolars en quai che reguarda il diever da la lingua.

In feedback che promova l'emprender ed ina reflexiun da quai che vegn emprendì favuriseschan l'augment da la materia emprendida. En quests secturs datti anc potenzial da svilup. Las scolas han realisà quai ed han instradà svilups en quella direcziun. Sco fermezza da la scola grischuna dastga vegnir punctuada la collavuraziun activa da las scolaras e dals scolars. Legraivel èsi ch'i po vegnir registrà in augment da la qualitad tar tut ils puncts evaluads en ina cumparegliaziun a lunga durada sur circa 15 onns.

Vasta evaluaziun
En il focus da l'evaluaziun da las scolas eran ils champs "cultura da scola e clima en scola" sco er "mussar ed emprender en l'instrucziun". Dals giudicaments da l'instrucziun, dals discurs spezials cun las persunas d'instrucziun sco er da las interrogaziuns da scolaras e scolars, da direcziuns da scola e da persunas responsablas per l'educaziun è resultà in profil d'instrucziun differenzià. Bundant 2000 persunas d'instrucziun, passa 18 500 scolaras e scolars, pli che 500 commembras e commembers da cussegls da scola, 132 direcziuns da scola e tut ils geniturs èn stads integrads en l'evaluaziun.

Sin basa da las enconuschientschas fatgas han las scolas definì in project da svilup ch'è vegnì realisà entaifer 2 onns. Terminada vegn l'evaluaziun mintgamai cun in controlling tras l'Inspecturat da scola che giuditgescha la realisaziun da las mesiras prendidas.

Evaluaziun separada da las scolas spezialas
En la medema perioda ha l'Inspecturat da scola evaluà per la segunda giada er tut las instituziuns da la scolaziun speziala dal Grischun. La procedura d'evaluaziun per las scolas spezialas è vegnida concepida sin basa da la procedura per la scola regulara ed en collavuraziun cun persunas spezialisadas da la Scola auta interchantunala da pedagogia curativa. Las relaziuns spezialas da las instituziuns da la scolaziun speziala èn vegnidas resguardadas commensuradamain, per exempel cun evaluar secturs specifics supplementars sco l'assistenza ed il process da la planisaziun da promoziun. Per l'evaluaziun èn vegnids interrogads geniturs, uffants e giuvenils sco er collavuraturas e collavuraturs. Il team d'evaluaziun ha fatg discurs cun tut las persunas pertutgadas ed ha observà situaziuns d'assistenza, da promoziun sco er d'instrucziun.

Dal rapport final chantunal resulta che la cuntentientscha da las persunas responsablas per l'educaziun cun lur instituziun respectiva è dapertut fitg gronda. Las collavuraturas ed ils collavuraturs s'engaschan fermamain per ils basegns individuals e specifics dals uffants e dals giuvenils. En tut las instituziuns da la scolaziun speziala è il process da la planisaziun da promoziun vegnì sviluppà vinavant e professiunalisà cleramain durant ils ultims onns. Potenzial da svilup datti en la realisaziun concreta e pratica da las finamiras da promoziun en l'instrucziun, en l'assistenza ed en la terapia. Partind dals resultats da l'evaluaziun elavuran las instituziuns da la scolaziun speziala almain duas mesiras da svilup liantas ch'ellas vegnan a realisar en il rom da lur planisaziun da plirs onns durant ils proxims 4 onns.

Ils rapports chantunals èn disponibels sin la pagina d'internet da l'Uffizi per la scola populara ed il sport.

Agiuntas:
- Rapport final chantunal: scola regulara 2015-20
- Rapport final chantunal: scola speziala 2015-20

Fotografias agiuntadas:

Infurmaziuns:
Alexi Nay, substitut dal manader da l'Inspecturat da scola dal Grischun, tel. +41 81 257 62 20, e-mail Alexi.Nay@avs.gr.ch

Gremi: Uffizi per la scola populara ed il sport
Funtauna: rg Uffizi per la scola populara ed il sport