La strategia cumplessiva da vaccinaziun e da test da la Regenza na prevesa betg mo tests en ils manaschis, mabain er tests repetids en las scolas. Ils tests da spida PCR en las scolas duain gidar ad identifitgar a temp chadainas d'infecziun e pussibilitar da cuntinuar cun l'instrucziun da preschientscha. Ils tests da massa en las scolas vegnan ad esser pussaivels previsiblamain a partir dal cumenzament da mars.
Ultra dals tests ch'èn vegnids cumenzads cun success en ils manaschis, prevesa la Regenza – en sia strategia cumplessiva da vaccinaziun e da test – er tests repetids en las scolas. Cun testar persunas asintomaticas duain chadainas d'infecziun en las scolas vegnir identifitgadas ed interruttas a temp. Consequentamain duai sche pussaivel vegnir cuntinuà cun l'instrucziun da preschientscha.
Perquai che adina dapli scolaras e scolars èn stads pertutgads d'infecziuns durant las ultimas emnas, èn vegnidas ordinadas analisas sistematicas da las erupziuns en las classas correspundentas. Cumplementarmain a las mesiras da protecziun vertentas han entiras classas stuì vegnir messas en quarantina en quest connex. Ils tests da massa sco er ils tests da pilot gia realisads en las scolas conferman che la rata d'infecziuns po vegnir sbassada visiblamain e duraivlamain tras tests repetids.
Tests da spida PCR en la procedura da pooling
Cuntrari als tests currents en ils manaschis, nua ch'i vegn fatg tests individuals, vegn applitgada per las scolas la "procedura da pooling" (procedura da tests da gruppas). Questa procedura è adattada cunzunt per analisar gruppas che duain vegnir testadas regularmain en il rom d'in sistem da diagnosa tempriva. Experientschas han gia pudì vegnir fatgas a chaschun d'emprovas da pilot cun scolaras e scolars da la scolina e da la scola primara. Ils tests da spida PCR sa laschan integrar bain en il mintgadi da scola. Tant per las scolaras ed ils scolars sco er per las persunas d'instrucziun e d'assistenza e per ils purtaders da scola èn quests tests voluntars. Per pudair cuntanscher la finamira dals tests da massa vegni premess che las scolaras ed ils scolars, ils purtaders da scola sco er la politica communala e chantunala demussian lur prontezza per ils tests.
Sustegn tras la Scola auta da pedagogia dal Grischun
La Regenza ha incumbensà il Stab directiv chantunal cun la realisaziun dals tests da massa en las scolas. Il Stab directiv vegn sustegnì da la Scola auta da pedagogia dal Grischun tar la direcziun dal project per organisar e per coordinar ils tests en las scolas cun tut las scolaras ed ils scolars en il chantun Grischun.
Dapi il december 2020 vegnan fatgs tests da pilot en las scolas d'Igis, Malans, Schiers, en la Scola media evangelica Schiers sco er en las scolas da la regiun Moesa. Las proximas emnas èn planisads ulteriurs tests da pilot, avant ch'ils tests voluntars pon vegnir purschids a partir dal cumenzament da mars en tut las scolas.
Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Funtauna: Uffizi da sanadad