La Regenza ha approvà la revisiun parziala da la planisaziun locala che la vischnanca da Churwalden aveva concludì ils 30 da zercladur 2020. Uschia vegnan stgaffidas en il dretg da planisaziun las premissas per engrondir e per organisar da nov il campadi Pradafenz sco planisà.
Planisada è ina restructuraziun da las plazzas per autos-rulotta e da las plazzas annualas per rulottas. Per quest intent vegnan las plazzas annualas dischlocadas dal sectur sut en il sectur d'engrondiment vest sura. Percunter duain vegnir stgaffidas ulteriuras plazzas per autos-rulotta en il sectur ost existent. Plinavant èn planisads en il sectur vest sura parcadis che remplazzan quels ch'èn ids a perder pervia da la nova telecabina Churwalden-Heidbüel. Il concept per l'engrondiment prevesa er l'installaziun d'ina plazza da giugar per uffants entaifer il campadi. La purschida dal campadi duai plinavant vegnir extendida tras bungalows.

Visualisaziun 2

©Ritter Schumacher SA

La Regenza ha approvà il concept per l'elavuraziun da la retscha da meds d'instrucziun "NaTec 1–6" en surmiran. Ella ha autorisà l'Uffizi per la scola populara ed il sport da dar las incumbensas necessarias. Fin l'avust 2025 duain ils meds d'instrucziun correspundents vegnir translatads ed edids en surmiran per la 1. fin 6. classa dal stgalim primar.
Ils custs per elavurar e per producir ils meds d'instrucziun importan circa 164 000 francs.

 

©Meds d'instrucziun dal Grischun, Uffizi per la scola populara ed il sport

La Regenza ha garantì als proprietaris da la chasa d'abitar "Casa Malussi" a Bondo ina contribuziun chantunala da maximalmain 35 580 francs per la restauraziun interna. En connex cun questa contribuziun vegn l'edifizi mess da qua envi sut protecziun da monuments chantunala. La chasa tutga tar ils edifizis ils pli vegls da Bondo ed è situada a l'ur nord da l'abitadi istoric. Ella figurescha en l'Inventari federal dals lieus svizzers d'impurtanza naziunala degns da protecziun (ISOS). Ultra da questa valur situativa extraordinariamain gronda è la chasa d'abitar d'ina impurtanza considerabla per l'istorgia da l'architectura e per la tgira da monuments, e quai pervia da ses stadi da mantegniment excellent. La chasa è vegnida construida il cumenzament dal 16avel tschientaner ed è vegnida auzada probablamain durant il 18avel/19avel tschientaner. A l'intern dattan en egl la repartiziun da las stanzas sco dal temp da construcziun, la salaschada da crap e da crappella, ils tavlegiads, ils tschalers ad arvieut e la cuschina cun fuclar avert e chapitsch dal chamin.

Fotografia 2 / Fotografia 3 / Fotografia 4

©Uffizi da cultura

La Regenza ha mess en vigur la revisiun parziala da la Lescha davart la gulivaziun da finanzas per il 1. da mars 2021. Ultra da quai ha ella approvà la revisiun parziala da l'Ordinaziun davart la gulivaziun da finanzas inclusiv ina midada en l'Ordinaziun da scola. Cun l'entrada en vigur pon las contribuziuns da gulivaziun per l'onn 2022 vegnir calculadas tenor las novas disposiziuns.
Plinavant è la revisiun parziala da la Lescha da taglia vegnida messa en vigur retroactivamain per il 1. da schaner 2021, e la revisiun parziala da las disposiziuns executivas tar la legislaziun fiscala è vegnida approvada. Cun la revisiun parziala da la Lescha da taglia vegnan reducidas considerablamain las tariffas da taglia per taxar las prestaziuns da chapital or dal provediment. Per tut las persunas ch'èn obligadas da pajar taglia importa la tariffa minimala da nov 1,5 pertschient e la tariffa maximala 2 pertschient. Uschia occupa il chantun Grischun ina plazza a la testa en cumparegliaziun cun ils auters chantuns.