"Rumantsch: in ferm toc Svizra": Cun quest motto lantscha il Departament federal d'affars exteriurs (DFAE) l'emprima "Emna rumantscha" en Svizra ed a l'exteriur. Sin invit dal cusseglier federal Ignazio Cassis sa participeschan il president da la Regenza Mario Cavigelli ed il cusseglier guvernativ Jon Domenic Parolini damaun, ils 19 da favrer 2021, a l'occurrenza iniziala a Berna.
Sin plaun internaziunal èsi gia dapi in temp pli lung tradiziun da realisar emnas tematicas per la lingua taliana ("Settimana della lingua italiana nel mondo") e per la lingua franzosa ("Semaine de la langue française et de la francophonie"). Sin iniziativa dal cusseglier federal Ignazio Cassis è ussa vegnida organisada er ina "Emna da la lingua rumantscha" (curt: "Emna rumantscha").
Occurrenza iniziala l'onn 2021 – termin annual fix a partir da l'onn 2022
La data simbolica per la "Emna rumantscha" è ils 20 da favrer: Ils 20 da favrer 1938 è la lingua rumantscha vegnida renconuschida uffizialmain en ina votaziun dal pievel sco quarta lingua naziunala – cun ils medems dretgs sco il tudestg, il franzos ed il talian. Pervia da la situaziun da COVID-19 ha lieu ils 19 da favrer 2021 in'occurrenza iniziala per part virtuala. A partir da l'onn 2022 duai la "Emna rumantscha" alura avair – mintgamai il favrer – in termin fix en il chalender. L'occurrenza annuala previsa ha la finamira da render attent a la situaziun da la quarta lingua naziunala sco er da suttastritgar l'impurtanza da la plurilinguitad per la coesiun naziunala.
Occurrenza online per la cultura rumantscha
L'occurrenza a Berna cumpiglia tranter auter referats d'input, ina runda da discussiun sco er diversas transmissiuns directas da persunas en Svizra ed a l'exteriur. Ina rolla impurtanta han ultra da quai las scolaras ed ils scolars da la vischnanca da Glion: cun lur statements rendan ellas ed els attent a l'impurtanza da la lingua rumantscha sco realitad vivida en lur mintgadi. Per l'accumpagnament musical da l'occurrenza procura la chantautura Martina Linn, ch'è creschida si en Engiadina.
La lantschada da la "Emna rumantscha" po vegnir persequitada live ils 19 da favrer 2021 en il rom da l'occurrenza online (da las 11.45 fin las 13.00 sin www.rtr.ch).
Infurmaziuns:
- president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
- cusseglier guvernativ dr. Jon Domenic Parolini, schef dal Departament d'educaziun, cultura e protecziun da l'ambient, tel. +41 81 257 27 01, e-mail Jondomenic.Parolini@ekud.gr.ch
Gremi: Departament d'educaziun, cultura e protecziun da l'ambient
Funtauna: rg Departament d'educaziun, cultura e protecziun da l'ambient