La refurma da las dretgiras è l'object da differentas decisiuns parlamentaras e da discussiuns actualas davart la fusiun da las dretgiras chantunalas superiuras. En il rom d'in rapport davart las immobiglias vegn la Regenza a suttametter al Cussegl grond variantas d'agir per ina retratga priorisada da l'edifizi chantunal per ina futura Dretgira superiura. Tenor il stadi actual dals scleriments pudess l'edifizi chantunal vegnir mess a disposiziun a la Dretgira superiura a partir da mez da l'onn 2025, sch'il chantun adattass la strategia d'immobiglias vertenta.
Las dretgiras chantunalas superiuras fan part da la strategia d'immobiglias per Cuira
La strategia chantunala d'immobiglias ch'il Cussegl grond ha concludì l'onn 2009 prevesa da stgaffir nov centers administrativs regiunals en tut il territori chantunal. Durant ils ultims 10 onns han pudì vegnir realisads definitivamain en las regiuns sis dals nov centers administrativs planisads. Cur che la segunda etappa dal center administrativ "sinergia" è realisà, duain – tenor la planisaziun oriunda – las dretgiras chantunalas superiuras retrair a Cuira l'edifizi chantunal a la Grabenstrasse che vegn duvrà actualmain da l'administraziun centrala da l'Uffizi chantunal da construcziun bassa. Sin basa da lur dretg d'autonomia, ch'è francà en la constituziun, han las dretgiras chantunalas superiuras approvà quest proceder envers la Regenza l'onn 2011.
Pervia da differentas proceduras giuridicas sco er la finala pervia da la pandemia da COVID-19 ha l'emprima etappa da "sinergia" pudì vegnir retratga pir il settember 2020 cun in retard da var 4 onns. En cas che la strategia d'immobiglias vegniss cuntinuada senza midadas ed en cas che la segunda etappa da "sinergia" vegniss realisada sco previs, stess l'edifizi chantunal a disposiziun al manaschi giudizial il pli baud l'onn 2030. Quests retardaments chaschunan in conflict temporal cun la refurma da las dretgiras currenta che prevesa ina fusiun persunala e locala da la Dretgira chantunala e da la Dretgira administrativa ad ina Dretgira superiura. Tenor l'urari actual èsi planisà ch'il parlament tractia la missiva correspundenta il zercladur 2022.
La Cumissiun da giustia pretenda ina tractativa priorisada dals basegns da spazi da la giustia
Ina incumbensa inoltrada da la Cumissiun per giustia e segirezza (CGS) durant la sessiun da december 2020 pretenda da la Regenza – en vista al retardament capità sco er en vista a la fusiun da las dretgiras persequitada cun la refurma da las dretgiras – ina surdada priorisada areguard il temp da l'edifizi chantunal. A l'avis da la CGS pretenda la refurma da las dretgiras da bel principi ina sedia giudiziala cuminaivla.
La Regenza preschenta il rapport davart las immobiglias cun propostas da variantas
En sia resposta a questa intervenziun parlamentara renconuscha la Regenza il giavisch da metter a disposiziun l'edifizi chantunal a la giustia, e quai en moda uschè priorisada sco pussaivel. En la sessiun d'october 2021 vegn ella a rapportar al Cussegl grond davart la strategia chantunala d'immobiglias ed a mussar las dependenzas temporalas dals differents projects da construcziun. En quest rapport davart las immobiglias vegn la Regenza er a far propostas da variantas che sa basan sin ils ultims conclus e sin las ultimas discussiuns dal parlament en connex cun la refurma da las dretgiras e che prevesan ch'ina Dretgira superiura possia retrair uschè svelt sco pussaivel l'edifizi chantunal grazia ad adattaziuns da la strategia d'immobiglias . Tenor il stadi actual dals scleriments da l'Uffizi chantunal da construcziun auta dastgassi esser pussaivel da retrair l'edifizi chantunal en il cas optimal il pli baud mez da l'onn 2025. Per quest intent stuessan l'emprim vegnir mess a disposiziun localitads substitutivas a l'administraziun centrala da l'Uffizi chantunal da construcziun bassa.
Mantegnair las opziuns d'agir per Cuira
En consequenza da las debattas politicas e da l'eventuala adattaziun da la strategia d'immobiglias per Cuira na duain vegnir prendidas – fin ch'il parlament ha tractà il rapport davart las immobiglias – naginas decisiuns ch'èn relevantas per las immobiglias e che pudessan avair in effect pregiuditgant sin opziuns d'agir pussaivlas. Pervia da quai ha la Regenza decidì en sia ultima sesida da sistir per entant ina concurrenza d'investiders currenta che concerna l'areal "Loëstrasse" sco er il process da vendita per la Villa Brügger che sa chatta sper l'edifizi chantunal. La Regenza vegn a decider davart l'ulteriur proceder areguard questa immobiglia, cur che las decisiuns politicas correspundentas èn avant maun.
Link:
Resposta da la Regenza a l'incumbensa da la Cumissiun per giustia e segirezza (CGS) concernent la coordinaziun da la strategia chantunala d'immobiglias cun la refurma da las dretgiras 3
Fotografia agiuntada:
Infurmaziuns:
president da la Regenza dr. Mario Cavigelli, schef dal Departament d'infrastructura, energia e mobilitad, tel. +41 81 257 36 01, e-mail Mario.Cavigelli@diem.gr.ch
Gremi: Regenza
Funtauna: Chanzlia chantunala