La realisaziun dal center per l'emprima registraziun da requirentas e requirents d'asil al Meiersboden sin il territori communal da Churwalden progredescha. Questa emna vegn installà il plazzal e fin la fin d'avrigl 2021 vegn dismess il sulom contaminà. Silsuenter cumenzan las lavurs da construcziun sco talas che vegnan ad esser terminadas fin la stad 2022. Igl è previs da metter en funcziun il center per l'emprima registraziun l'avust 2022.
La decisiun dal Tribunal federal dals 3 da fanadur 2019 ha confermà la permissiun da construcziun dals 2 da favrer 2017 uschia che la permissiun da construcziun è legalmain valaivla. Pervia da quai ha l'Uffizi da construcziun auta reprendì l'atun 2020 la planisaziun dal nov center per l'emprima registraziun da requirentas e requirents d'asil. Ussa vegni cumenzà cun las lavurs da construcziun al Meiersboden sin il territori communal da Churwalden.
Planisaziun e cumenzament da las lavurs
Tut las lavurs da preparaziun e da stgavament han lieu fin mez matg 2021. Suenter vegni cumenzà cun las lavurs da construcziun sco talas. Fin mez fanadur 2021 èn planisadas las lavurs d'impressari e fin il cumenzament da december 2021 duai vegnir terminada la construcziun en lain. Per las lavurs interiuras è previs il temp dal december 2021 fin mez avust 2022. Suenter duai il center per l'emprima registraziun da requirentas e requirents d'asil avrir sias portas.
Fotografia agiuntada:
Infurmaziuns:
Markus Dünner, architect chantunal, Uffizi da construcziun auta, tel. +41 81 257 36 31, e‑mail Markus.Duenner@hba.gr.ch
Gremi: Uffizi da construcziun auta
Funtauna: rg Uffizi da construcziun auta