Sonda, ils 27 da mars 2021, ha la surveglianza da chatscha a Valragn fixà cun success in emettur ad in luf dal triep dal Beverin. En vischinanza da l'abitadi è l'animal vegnì narcotisà ed equipà cun in cularin da GPS. Uschia vuless'ins spaventar ils lufs e survegnir cun las datas futuras dapli infurmaziuns davart il cumportament dals animals en il territori.
L'animal da rapina è returnà sin far notg tar in animal selvadi stgarpà. La surveglianza da chatscha – ch'era s'installada ordavant en vischinanza dal cadaver – ha pudì sedir l'animal cun ina frizza da narcotisar. I sa tracta d'in animal masculin creschì. Suenter la retratga da differentas provas ha il luf da 35 kilograms puspè pudì vegnir laschà liber.
Perscrutaziun ed acziun da spaventar
L'emettur ha plirs intents. Tras l'emettur da GPS poi vegnir eruì, nua ch'il luf sa trategna e sa mova. L'Uffizi da chatscha e pestga (UCP) spera da survegnir uschia novas enconuschientschas davart il cumportament e davart ils lieus da dimora preferids dals lufs. Ultra da quai duai l'emettur spaventar l'animal. In luf che collia in tractament correspundent ed in emettur cun in eveniment negativ en vischinanza d'installaziuns da l'uman, duess tegnair en l'avegnir dapli distanza dals umans.
Gronda preschientscha da lufs en Valragn
Singuls lufs sa trategnan er durant il di en vischinanza dals abitadis ed èn pauc timids envers l'uman. Mesemna, ils 25 da mars 2021, han pliras persunas pudì observar e filmar in singul luf a Nufenen. La surveglianza da chatscha observa cun blera forza la situaziun al lieu.
Sche lufs sa trategnan durant il di en vischinanza dals abitadis u mussan er auters cumportaments singulars, ston las collavuraturas ed ils collavuraturs dal UCP far sche pussaivel acziuns da spaventar. Per ch'ils lufs possian vegnir spaventads cun success e per ch'els daventian pia pli timids envers l'uman e sias installaziuns, ston las acziuns da spaventar avair lieu il dretg mument en vischinanza d'installaziuns da l'uman. En vischinanza dals abitadis na poi betg vegnir montà dapertut in indriz cun tun da ballas u da ballins. Ils cadavers d'animals selvadis stgarpads vegnan dismess, sch'els vegnan chattads en il territori d'abitadi. Sche las temperaturas s'augmentan e sche la naiv sin las spundas lieua, vegnan ils tschiervs puspè a sa render en regiuns pli autas ed a sa reparter meglier. En il territori d'abitadi vegnan pia bainbaud er ils lufs ad esser adina main preschents.
Infurmaziuns:
dr. Adrian Arquint, manader da l'Uffizi da chatscha e pestga dal Grischun, tel. +41 81 257 38 92 (cuntanschibel per telefon tranter las 11.00 e las 12.00), e-mail Adrian.Arquint@ajf.gr.ch
Gremi: Uffizi da chatscha e pestga
Funtauna: rg Uffizi da chatscha e pestga