En il Grischun duessan tut las persunas che vulan sa laschar vaccinar, survegnir fin la fin da zercladur lur emprima vaccinaziun cunter corona. Las proximas emnas quinta il chantun cun furniziuns pli grondas da dosas da vaccinaziun. Per pudair injectar quellas uschè svelt sco pussaivel e per simplifitgar la planisaziun vegn adattà il plan da vaccinaziun actual. Da nov vegn priorisada la populaziun tenor gruppas da vegliadetgna. Ultra da quai survegn il persunal da sanadad in access prioritar a las vaccinaziuns.

Var 1200 persunas sa laschan actualmain vaccinar mintga di en il Grischun. L'emna proxima vegn spetgada ina furniziun da var 15 000 dosas da vaccinaziun. Fin la fin da zercladur 2021 vegnan furnidas var 184 100 dosas da vaccinaziun. Uschia pon ins actualmain partir dal fatg che tut las Grischunas ed ils Grischuns che vulan sa laschar vaccinar, han survegnì l'emprima vaccinaziun fin la fin da zercladur.

Durant las ultimas emnas èn ils centers da vaccinaziun sa preparads per capacitads pli grondas ed èn pronts d'injectar entaifer curt temp questas quantitads. Per meglierar la planisaziun vegn adattà il plan da vaccinaziun. Da nov vegn priorisada la populaziun tenor gruppas da vegliadetgna. Uschia poi vegnir garantì che las gruppas exponidas (persunal da sanadad che ha contact cun persunas spezialmain periclitadas) sco er talas cun malsognas cronicas pli levas (principalmain persunas da 45 onns e dapli) survegnian svelt lur vaccinaziun. Ultra da quai survegn il persunal da sanadad in access prioritar a las vaccinaziuns.

Preannunzia pussaivla per tut las persunas da 45 onns e dapli
Per pudair vaccinar senza incaps dieschmillis Grischunas e Grischuns da la gruppa da vegliadetgna da 16 fin 65 onns vegn questa gruppa dividida en sutgruppas da mintgamai diesch annadas.

Il persunal da sanadad sco er persunas da 45 onns e dapli pon sa preannunziar per ina vaccinaziun a partir da gievgia, ils 8 d'avrigl 2021. Quai è necessari per pudair planisar l'acziun da vaccinaziun la pli gronda da l'istorgia grischuna pli giuvna en collavuraziun cun ils centers da vaccinaziun. Ils termins da vaccinaziun na vegnan betg surdads immediatamain – i po dar temps da spetga fin 2,5 mais. La surdada dals termins da vaccinaziun vegn ussa priorisada tenor la vegliadetgna. Uschia vegnan er vinavant priorisadas persunas cun grevas malsognas cronicas preexistentas e persunas da 75 onns e dapli.

Vaccinà la maioritad da las persunas dad 80 onns e dapli che han vulì ina vaccinaziun
La quantitad da vaccins era limitada cunzunt il schaner, al cumenzament da la campagna da vaccinaziun. Perquai ha il chantun Grischun elavurà e realisà il plan da vaccinaziun tenor la priorisaziun proponida da la Cumissiun federala per vaccinaziuns. La gronda maioritad da las emprimas trais gruppas (abitantas ed abitants da chasas da persunas attempadas, persunas da 75 onns e dapli, persunas cun grevas malsognas cronicas) ha survegnì ses termin da vaccinaziun. Plinavant èn vaccinadas praticamain tut las persunas dad 80 onns e dapli ch'eran s'annunziadas sur la plattafurma (quai correspunda a var 53 pertschient da la populaziun dad 80 onns e dapli). Actualmain vegnan persunas da 75 onns e dapli, persunas cun grevas malsognas cronicas sco er persunas da 65 fin 74 onns clamadas ad in termin da vaccinaziun.

Las infurmaziuns davart las vaccinaziuns cunter corona vegnan cumplettadas cuntinuadamain sin la pagina d'internet www.gr.ch/impfung.

Agiunta:

Plan da vaccinaziun (stadi: 8 da avrigl 2021)

Infurmaziuns:
Post da communicaziun per il coronavirus dal chantun Grischun, e-mail kfsmedien@amz.gr.ch

Gremi: Regenza
Funtauna: Chanzlia chantunala