En in center da senioras e seniors en la Val dal Rain da Cuira è vegnida constatada ina cumulaziun da cas da corona. Pertutgads èn quatter abitantas ed abitants ch'eran vegnids vaccinads cumplettamain gia il favrer 2021. L'Uffizi da sanadad analisescha actualmain ils cas. Las persunas pertutgadas han decurs miaivels da la malsogna. In'ulteriura cumulaziun da cas da corona è vegnida constatada en il center da partenza Flüeli a Valzeina.
Il contact tracing chantunal ha registrà ina cumulaziun da cas da corona en in center da senioras e seniors. Actualmain èn pertutgads quatter abitantas ed abitants ch'èn vegnids vaccinads mez schaner 2021 per l'emprima giada ed il cumenzament da favrer 2021 per la segunda giada cun il vaccin Comirnaty. Tenor il studi d'admissiun reducescha il vaccin RNA da Pfizer/BioNTech per 95 pertschient la ristga da s'infectar cun COVID‑19.
Ils tests en ils manaschis han impedì in'erupziun da corona
En collavuraziun cun la direcziun da l'instituziun ha l'Uffizi da sanadad prendì las mesiras necessarias per proteger las abitantas ed ils abitants sco er il persunal da tgira. Las persunas pertutgadas èn en isolaziun ed han decurs miaivels da la malsogna. Per las abitantas ed ils abitants vaccinads è vegnida reintroducida l'obligaziun da purtar ina mascrina. En il center da senioras e seniors è il concept da protecziun vegnì realisà strictamain. Plinavant sa participescha l'instituziun als tests regulars en ils manaschis: cun tests svelts d'antigens vegnan las collavuraturas ed ils collavuraturs testads regularmain sin il coronavirus. Perquai ch'igl ha dà emprims cas positivs tar abitantas ed abitants betg vaccinads, èn vegnids fatgs tests da massa en intervals regulars. Quests tests han cumprovà ina infecziun tar quatter abitantas ed abitants. Ina persuna dad 84 onns cun grevas malsognas preexistentas è morta dacurt. Davart la raschun da la mort na pon actualmain anc vegnir fatgas naginas indicaziuns.
Ils cas da corona vegnan analisads
En il chantun Grischun èn vegnidas vaccinadas passa 80 pertschient da las abitantas e dals abitants da las chasas da persunas attempadas e da tgira. Cumbain ch'i n'èn vegnidas registradas naginas erupziuns pli en las chasas da dimora, hai dà singulas infecziuns. Quai, perquai ch'i n'exista nagina obligaziun da vaccinaziun per las persunas spezialmain periclitadas en las chasas da persunas attempadas e da tgira e perquai che betg tut las persunas na sa laschan vaccinar. Er suenter las vaccinaziuns poi dar malsognas, en spezial sch'igl è vegnida injectada pir ina vaccinaziun u sche la segunda vaccinaziun è vegnida injectada pir dacurt. La protecziun cumplaina da la vaccinaziun vegn cuntanschida 14 dis suenter la segunda dosa.
Las mesiras da protecziun ston vegnir observadas vinavant
Il motiv per la cumulaziun da cas vegn actualmain analisà da l'Uffizi da sanadad dal Grischun e da persunas spezialisadas externas. L'Uffizi da sanadad appellescha a las persunas vaccinadas d'observar – malgrà la vaccinaziun – strictamain las reglas da distanza e d'igiena vertentas. Ina vaccinaziun protegia cunter in grev decurs da la malsogna. Studis da l'Israel e da la Gronda Britannia portan emprims indizis che vaccinaziuns pon proteger er cunter transmissiuns, ma per il mument mancan anc datas segiradas.
Cumulaziun da cas en il center da partenza Flüeli
La gievgia saira ha il contact tracing registrà ultra da quai ina cumulaziun da cas da corona en il center da partenza Flüeli a Valzeina. Actualmain èn 17 da 24 persunas positivas. L'Uffizi da sanadad ha mess sut quarantina il center da partenza ed isolà las persunas pertutgadas – ellas han decurs miaivels da la malsogna. Las abitantas ed ils abitants negativs passentan la quarantina en chombras singulas. Actualmain è il center da partenza occupà per var 50 pertschient.
Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch
Gremi: Uffizi da sanadad
Funtauna: Chanzlia chantunala