Per il 1. d'avrigl 2021 ha la Confederaziun concludì novaziuns en il program per cas da direzza. Ella ha auzà la limita da contribuziun sin 1 milliun francs. Plinavant han ussa er interpresas ch'èn vegnidas fundadas tranter il 1. da mars ed ils 30 da settember 2020 il dretg d'inoltrar ina dumonda per agids en cas da direzza. Per interpresas cun ina svieuta annuala da passa 5 milliuns francs ha la Confederaziun deliberà reglas unitaras per l'entira Svizra.
Il chantun adattescha sia execuziun da las mesiras per cas da direzza a la novaziun da la Confederaziun. Per il 1. d'avrigl è la limita da contribuziuns per cas da direzza vegnida auzada sin maximalmain 1 milliun francs per interpresas cun ina svieuta annuala fin 5 milliuns francs. Plinavant ha la Confederaziun fatg midadas per dus tips d'interpresa: per interpresas ch'èn vegnidas fundadas tranter il 1. da mars 2020 ed ils 30 da settember 2020 e per interpresas che han ina svieuta annuala da passa 5 milliuns francs.
Interpresas fundadas tranter il 1. da mars ed ils 30 da settember 2020
Interpresas ch'èn vegnidas fundadas tranter il 1. da mars 2020 ed ils 30 da settember 2020 pon inoltrar a partir d'immediat ina dumonda. Interpresas che han gia tschentà ina dumonda, ma che han survegnì ina resposta negativa, na ston betg inoltrar ina nova dumonda. Questas dumondas vegnan suttamessas d'uffizi ad ina nova examinaziun ed ad in nov giudicament.
Interpresas cun ina svieuta annuala da passa 5 milliuns francs
Per interpresas cun ina svieuta annuala media da passa 5 milliuns francs valan en l'entira Svizra reglas federalas unitaras. Uschia vala ina limita da contribuziun da 5 milliuns francs e da 20 pertschient da la svieuta da l'onn precedent. En cas da perditas da la svieuta da passa 70 pertschient valan 10 milliuns francs e 30 pertschient.
Er vinavant vala ina "participaziun cundiziunada al gudogn". Contribuziuns che vegnan pajadas a partir dal 1. d'avrigl 2021 ston vegnir restituidas al chantun en la dimensiun dal gudogn annual suttamess a la taglia da l'onn 2021. Perditas da l'onn 2020 vegnan resguardadas. Interpresas cun ina svieuta da passa 5 milliuns francs na ston betg tschentar ina nova dumonda, sch'ellas avevan gia inoltrà ina dumonda.
Pass da schluccada per ils 19 d'avrigl 2021: cuntinuaziun dals agids per cas da direzza
Cun ils agids per cas da direzza vegni cuntinuà er suenter ils pass da schluccada dals 19 d'avrigl 2021. Quai vala en spezial per ils manaschis da gastronomia, perquai che quels n'èn anc betg averts dal tuttafatg. En in emprim pass indemnisescha il chantun Grischun las perditas da la svieuta che las interpresas han subì davent dal cumenzament da la pandemia mez mars 2020 fin e cun il mars 2021. Concernent contribuziuns per perditas da la svieuta a partir dal 1. d'avrigl 2021 ed ils mais suandants vegni infurmà pli tard.
Tut las infurmaziuns concernent ils agids per cas da direzza stattan a disposiziun sin la pagina d'internet dal Departament d'economia publica e fatgs socials.
Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)
Gremi: Departament d'economia publica e fatgs socials
Funtauna: Chanzlia chantunala