Per dumagnar la pandemia dal coronavirus sa basa il chantun Grischun sin in concept da protecziun cumplessiv. Ultra da la campagna da vaccinaziun e da la retrofastisaziun da las chadainas da transmissiun tras il Contact tracing chantunal vegn realisada dapi il favrer 2021 ina vasta strategia da test en manaschis ed en scolas. L'evaluaziun da l'Institut federal da controlla da material e da perscrutaziun Empa mussa ch'il testar repetidamain fraina cumprovadamain la pandemia.

Per dumagnar la pandemia dal coronavirus sa basa il chantun Grischun sin in concept da protecziun cumplessiv. Uschia ha el sviluppà mesiras per franar persistentamain ils dumbers d'infecziuns sco alternativa a las mesiras rigurusas che restrenschan la vita publica. Ultra da la campagna da vaccinaziun che progredescha bain sa basa il chantun Grischun sin testar repetidamain en manaschis ed en scolas. Uschia vegnan testadas passa 40 000 persunas per emna – quai correspunda a var 30 pertschient da la populaziun mobila.

Reducziun da las incidenzas tut tenor la branscha
Sut la direcziun da dr. Hossein Gorji han perscrutadras e perscrutaders da l'Institut federal da controlla da material e da perscrutaziun Empa evaluà las emprimas 8 emnas dal program da test. Ils resultats mussan ch'i po vegnir observada ina reducziun da la rata d'incidenza – quai è il dumber da persunas infectadas per 100 000 abitantas ed abitants – per 20 fin 50 pertschient tar las persunas testadas. En quest connex sa laschan observar differenzas signifitgantas tar las differentas branschas economicas; valurs da reducziun pli pitschnas èn vegnidas constatadas en las branschas cun in'auta mobilitad (p.ex. en il turissem), valurs da reducziun pli grondas tar persunas emploiadas che lavuran en biros ed en manaschis da producziun. Quai po vegnir declerà cun las interacziuns socialas ch'èn differentamain numerusas en questas professiuns. La probabilitad da s'infectar tar persunas che na sa participeschan betg al program da test è pli auta en las branschas cun in'auta mobilitad. Tuttina: grazia a la gronda participaziun als tests han ils dumbers da cas pudì vegnir reducids malgrà la mobilitad.

Program da tests sustegna la reducziun da la pandemia
In'emprima analisa da las datas dals tests en las scolas conferma quest effect: il dumber d'erupziuns en instituziuns da scola è er sa reducì cleramain suenter ch'ils tests facultativs èn vegnids introducids.
Il facit da l'analisa da la Empa – ina partiziun da la SPF – suttastritga l'effect dals tests regulars. Ultra da las mesiras vertentas sco tegnair distanza, purtar ina mascrina e dischinfectar ils mauns gida il program da test cumprovadamain a franar la pandemia. Testar repetidamain dat plinavant al chantun in maletg exact da la situaziun pertutgant la derasaziun da la pandemia e gida a relaschar mesiras intenziunadas. Ultra da quai profitan ils manaschis participants da las facilitaziuns da quarantina. Uschia na ston collavuraturas e collavuraturs che han gì in stretg contact (main che 1,5 meters distanza durant dapli che 15 minutas senza protecziun adattada) cun ina persuna infectada betg ir en quarantina. Ellas ed els pon lavurar vinavant, sch'ellas ed els n'han vinavant nagins sintoms e sch'ils tests fatgs durant 7 dis en il rom dals tests en ils manaschis, èn mintga di negativs. Cur che quests 7 dis èn passads, midan ellas ed els puspè al ritmus da test usità.

Dapi il 1. da favrer 2021 èn vegnids evaluads 427 000 tests en il Grischun. Da quels 223 158 tests en 1996 manaschis e 127 714 tests en 165 scolas.

Infurmaziuns da l'Empa

Agiunta:
Preschentaziun

Infurmaziuns:
Post da communicaziun per il coronavirus dal chantun Grischun, e‑mail kfsmedien@amz.gr.ch, tel. +41 79 716 22 95 (exclusivamain per collavuraturas e collavuraturs da las medias)

Gremi: Uffizi da sanadad
Funtauna: rg Uffizi da sanadad