Per il "World No Tobacco Day" da l'Organisaziun mundiala da la sanadad WHO dals 31 da matg 2021 lantscha l'Uffizi da sanadad dal Grischun in'acziun da sensibilisaziun en las scolas grischunas dal stgalim secundar II. La finamira da l'acziun è quella ch'ils giuvenils declerian activamain d'esser nunfimaders e ch'els survegnian dapli infurmaziuns davart il tema.

Ils uffants ed ils giuvenils èn la gruppa en mira la pli impurtanta da la prevenziun dal tubachissem. 85 pertschient da las fimadras e dals fimaders cumenzan a fimar avant il 21. onn da vegliadetgna. In zic dapli che 10 pertschient dals giuvenils da 15 onns fiman almain ina giada per emna. Tant pli impurtant èsi perquai da sensibilisar ils giuvenils cun infurmaziuns seriusas ed adattadas a la vegliadetgna, per ch'els possian sa decider intenziunadamain cunter il fimar. Dapi l'onn 1987 proclamescha la WHO mintga onn ils 31 da matg il Di mundial cunter il fimar, al "World No Tobacco Day". Quest onn sut il motto "Di na al fimar".

Acziun per il "World No Tobacco Day"
Ils 31 da matg 2021 mainan scolaras e scolars in stan d'infurmaziun a l'entrada da lur chasa da scola e rendan attent lur conscolaras e conscolars cun in'acziun da distribuziun al "World No Tobacco Day". Grazia a scolaras e scolars che mainan il stan e che decleran activamain d'esser nunfimaders po questa acziun per la prevenziun da dependenza en la scola vegnir realisada da giuvenils per giuvenils. La direcziun da la scola sustegna l'acziun e gida uschia en moda essenziala a la promoziun da la sanadad ed a la prevenziun en la scola. Las suandantas scolas sa participeschan a l'acziun:

• Scola da tscherna da professiun, Cuira
• Center da furmaziun per la sanadad ed ils fatgs socials CSS, Cuira
• Scola chantunala grischuna, Cuira
• Scola media evangelica, Schiers
• Lyceum alpinum, Zuoz
• Plantahof, Landquart

Plattafurma d'infurmaziun grischuna per giuvenils gr.feel-ok.ch
Il consum da tubac è in da blers temas che occupa ils giuvenils. Sin la plattafurma d'infurmaziun gr.feel-ok.ch chattan giuvenils infurmaziuns seriusas davart tut ils temas dal daventar creschì, quizs interessants, purschidas d'agid ed adressas per dumondas e per giavischs.

Infurmaziuns:
Denise Rudin, manadra da la partiziun Promoziun da la sanadad e prevenziun, Uffizi da sanadad dal Grischun, tel. +41 81 257 64 02, e-mail Denise.Rudin@san.gr.ch

Gremi: Uffizi da sanadad
Funtauna: rg Uffizi da sanadad