Il project da l'october 2020 per construir rempars en ils flums Bondasca e Maira en la vischnanca da Bregaglia è vegnì approvà cun intginas cundiziuns e permissiuns. Ultra da quai ha la Regenza concedì ina contribuziun chantunala da 7 milliuns francs tenor la Lescha davart la correcziun dals curs d'aua ed ina contribuziun chantunala da circa 6,6 milliuns francs tenor la Lescha davart las vias.

Il curs da la Bondasca vegn schlargià ed a medem temp auzà per circa 2 fin 3 meters cun construir rempars da terra e mirs a las rivas. Curtins sin terrassas e guaudets cunfinads cun mirs duain furmar la zona da transiziun al territori d'abitadi vischin. Er en la Maira èn previsas mesiras da la construcziun idraulica. Per proteger il lieu Spino, la via da Promontogno e la via da Soglio èsi previs d'auzar la riva dretga. Il project general na cumpiglia dentant betg mo rempars en flums en il senn pli stretg. Gist uschè impurtantas èn las adattaziuns necessarias vi dals stabiliments d'infrastructura existents, particularmain vi da las vias chantunalas e vi da las ovras communalas (vias d'avertura, conducts d'ovra, fermada da l'auto da posta). Il project cumpiglia duas novas punts sur la Bondasca ("punt" e "punt da la via da Malögia") ed ina sur la Maira ("Spizarun"). Al punct central da traffic tranter la via da Malögia e la via da Promontogno vegn construida da nov ina rundella.

©ARGE "strata"

La Regenza ha dà glisch verda per la correcziun da la via da Cunter tranter Mon e Navaras. Il traject d'ina lunghezza da circa 1,5 kilometers da la via per Cunter al vest dal Surses è en in nausch stadi. Tant la limitaziun dal pais maximal permess da 13 tonnas sco er la ladezza da la via da per part main che 3,5 meters na satisfan betg pli als basegns actuals ed a las pretensiuns d'ozendi envers ina via da colliaziun.

En il rom dal project duai vegnir schlargià il vial a 4,2 meters e renovada la surstructura da la via. Plinavant èn necessaris novs mirs da sustegn sin divers trajects da la vart da la val. Ils custs totals da quest project importan circa 7,45 milliuns francs.

La Regenza ha approvà il project "Reparaziun d'averturas e prevenziun cunter incendis da guaud 2021", in project collectiv da differentas vischnancas. Per quest intent ha ella concedì ina contribuziun chantunala da circa 12,8 milliuns francs.

Il project cumpiglia la reparaziun da vias da guaud e da maschinas da totalmain 56,9 kilometers ch'èn repartids sin 74 objects singuls. Tras quai vegn meglierada l'avertura da guauds da protecziun da circa 10 400 hectaras e d'ulteriurs guauds da circa 4000 hectaras. Ultra da quai cumpiglia il project la construcziun da trais novs batschigls d'aua da stizzar fieu: mintgamai in a Domat, a Tavau ed a Puntraschigna. Plinavant cumpiglia quest project collectiv l'acquisiziun da material da stizzar fieu per las 12 basas da pumpiers regiunalas per incendis da guaud.

 

Foto 1 Razén: Via da guaud glischnada suenter precipitaziuns fermas
Foto 2 Cuira: Exempel d'in batschigl d'aua da stizzar fieu gia construì