Avant indesch onns han cumenzà nov interpresas pitschnas e mesaunas (IPM) da la Val dal Rain grischuna, accumpagnadas dal Post da stab per l'egualitad da las schanzas, a concepir ed ad amplifitgar cundiziuns da lavur favuraivlas per famiglias en lur manaschis. Fin l'onn 2021 èn sa participadas 26 IPM da set regiuns al "program d'acziun: Structuras favuraivlas per famiglias sco factur da success". Il program d'acziun vegn terminà cun il project IPM Engiadina, glindesdi, ils 7 da zercladur 2021, en in'occurrenza publica online.
En tut las branschas exista ina mancanza da persunas spezialisadas, e questa mancanza daventa anc pli critica pervia da la situaziun periferica dal chantun Grischun. Per pudair subsister en questa concurrenza dovri bunas cundiziuns generalas. In factur pli e pli impurtant daventa en quest connex er la meglra cumpatibilitad da la professiun cun la famiglia per dunnas e per umens. Il program d'acziun ha furnì in sustegn sin quest champ durant indesch onns. 2000 collavuraturas e collavuraturs da las IPM participadas han profità da var 100 mesiras singulas ch'èn vegnidas realisadas en lur manaschis. "Las interpresas participadas survegnan e mantegnan las persunas spezialisadas dumandadas purschend cundiziuns da lavur che permettan da restar en la vita professiunala er en cas da grevezzas famigliaras pli grondas", uschia cusseglier guvernativ Jon Domenic Parolini. Tras quai vegn creada ina situaziun da win-win per tuttas duas varts.
Structuras favuraivlas per famiglias en la pratica
L'occurrenza a chaschun da la terminaziun dal program, da glindesdi, ils 7 da zercladur, da las 17.00 fin las 19.00, dat invistas concretas e respostas tge experientschas che quests manaschis han fatg en il rom dals projects IPM, tge success ch'els han cuntanschì e tge sfidas ch'als spetgan. Las IPM da trais generaziuns da project sa barattan. En ses referat d'input dilucidescha la scienzada sociala Lucia Lanfranconi las consequenzas da la crisa da COVID-19 per la cumpatibilitad, mettend il focus sin il Grischun.
L'occurrenza sa drizza ad IPM, a persunas ch'èn responsablas per il persunal, a persunas da la politica e da l'economia sco er a lavurantas e lavurants che s'engaschan per mesiras economicas innovativas e favuraivlas per famiglias e ch'èn interessads al success d'ina ballantscha tranter famiglia e professiun. L'annunzia è necessaria. Il link d'annunzia sco er ulteriuras infurmaziuns chattais Vus en tudestg sin www.stagl.gr.ch.
Agiunta:
Invitaziun sco datoteca da PDF cun link d'annunzia
Infurmaziuns:
Susanna Mazzetta, manadra dal project, Post da stab per l'egualitad da las schanzas, tel. +41 81 257 35 72 / +41 79 483 74 01, e‑mail Susanna.Mazzetta@stagl.gr.ch
Gremi: Post da stab per l'egualitad da las schanzas
Funtauna: rg Post da stab per l'egualitad da las schanzas