Pretschs da laina bass han marcà l'onn forestal 2020. Tuttina èn ils guauds da protecziun vegnids cultivads cun quità. La promoziun da la biodiversitad forestala e la cultivaziun da guauds difficilmain accessibels n'èn betg vegnidas negligidas. Grazia a la cultivaziun dal guaud giuven vegn il guaud futur concepì en vista a la midada dal clima.

En il chantun Grischun èn vegnids cultivads en media guauds da totalmain 3800 hectaras durant ils ultims 10 onns. L'onn 2020 ha cumpiglià la surfatscha ch'è vegnida cultivada dals manaschis forestals publics e da las interpresas forestalas, ina dimensiun da tut en tut 3400 hectaras. Quai correspunda ad 1,5 pertschient da la surfatscha totala dal guaud da var 210 000 hectaras. La cultivaziun vegn fatga tenor ils princips da la persistenza e da la selvicultura natirala. Uschia po il guaud ademplir a lunga vista las differentas pretensiuns da la societad ed è abel da far frunt a las sfidas da la midada dal clima. Durant l'onn 2020 èn vegnids racoltads tut en tut 330 000 meters cubic laina en il guaud grischun.

Cultivaziun dals guauds da protecziun è centrala
La cultivaziun dals guauds da protecziun furma il center da las activitads forestalas. In guaud stabil e saun è la protecziun la pli bunmartgada cunter privels da la natira. Dal guaud da protecziun da var 122 000 hectaras en il Grischun èn vegnidas cultivadas durant l'onn passà circa 2400 hectaras. Quai correspunda a la media dals onns precedents. Per la cultivaziun da guauds da protecziun da 2100 hectaras han las proprietarias ed ils proprietaris da guaud pudì profitar da contribuziuns federalas e chantunalas.

Biodiversitad e cultivaziun da guauds difficilmain accessibels
La cunvegna da program «Guaud» permetta tranter auter da cultivar ils guauds grischuns e da promover la biodiversitad en il guaud. Durant l'onn 2020 è vegnida tractada ina biodiversitad forestala da var 330 hectaras. Latiers tutgan en spezial mesiras per promover la giaglina da guaud, per promover chagliom spezial sco er per cultivar guauds pasculads, selvas ed urs dal guaud.
Per utilisar en moda persistenta il potenzial da laina, er en territoris cun gronds custs da racolta, vegn realisà in program «crana a cabel a lunga distanza/crana a cabel». Grazia a questa categoria da project èn vegnids racoltads supplementarmain 27 000 meters cubic laina. Questa quantitad correspunda circa ad 8 pertschient da tut la racolta da laina en il chantun Grischun. Cun realisar quest project vegnan resguardads commensuradamain er ils interess da la protecziun da la natira.

Cultivaziun dal guaud giuven promova guaud persistent
Ordaifer il guaud da protecziun èn vegnids cultivads supplementarmain guauds giuvens da 190 hectaras. Questa cultivaziun influenzescha er la cumposiziun da las spezias da bostgs. En vista al svilup dal guaud en connex cun la midada dal clima è quai in aspect decisiv. La finamira è quella da concepir il guaud grischun en moda multifara, persistenta e fitta per il clima. Cun las dretgas strategias forestalas pon ins minimar las ristgas ed augmentar la resistenza dals guauds.

Fotografia agiuntada:

Infurmaziuns:
- Urban Maissen, selvicultur chantunal, Uffizi da guaud e privels da la natira, tel. + 41 81 257 38 51, e‑mail Urban.Maissen@awn.gr.ch
- dr. Riet Gordon, manader dal sectur Planisaziun dal guaud e reviers forestals, Uffizi da guaud e privels da la natira, tel. +41 81 257 38 55, e‑mail Riet.Gordon@awn.gr.ch

Gremi: Uffizi da guaud e privels da la natira
Funtauna: rg Uffizi da guaud e privels da la natira