La Regenza ha deliberà la missiva tar ina revisiun parziala da la Lescha davart l'execuziun giudiziala per mauns dal Cussegl grond. Cun il project da revisiun vegn la Lescha davart l'execuziun giudiziala adattada al dretg federal. Plinavant vegnan resguardads ils svilups en la pratica da l'execuziun giudiziala.

En la consultaziun ha il project survegnì per gronda part in resun positiv. Critica è vegnida exprimida cunzunt envers la regulaziun proponida da delegar incumbensas d'execuziun a terzas persunas d'ordaifer l'administraziun centrala. Er la cussegliaziun extendida en cas da violenza è vegnida crititgada.

Delegaziun d'incumbensas d'execuziun a terzas persunas
L'ordinaziun, la surveglianza e la terminaziun da sancziuns penalas tutgan tar las incumbensas statalas centralas e na pon betg vegnir delegadas. Il chantun Grischun exequescha pia sez la gronda part dals chastis e da las mesiras. En tscherts cas sto il chantun dentant pudair engaschar terzas persunas, per exempel en cas che pretendan enconuschientschas specificas. Uschia collavuran las autoritads executivas cumpetentas cun persunas spezialisadas cunzunt en il rom da l'execuziun da mesiras ambulantas e staziunaras, da controllas medicalas da directivas penalas (per exempel la controlla da l'urin) u d'expertisas forensicas. En quests secturs na dispona l'administraziun centrala da nagina purschida da prestaziuns u betg d'ina purschida adequata. Las autoritads executivas pon perquai furnir las prestaziuns executivas necessarias mo, sch'ellas engaschan terzas instituziuns ubain persunas spezialisadas uffizialas respectivamain privatas. Questas furmas da cooperaziun han ina lunga tradiziun en l'execuziun giudiziala e garanteschan ch'ils meds finanzials vegnian impundids en moda efficazia. Quai duai vegnir formulà pli cleramain en la lescha.

Instrument per examinar la confidenza
Las autoritads executivas duain survegnir la pussaivladad da laschar suttametter persunas, che vegnan incaricadas cun incumbensas executivas, ad in'examinaziun da la segirezza. Questa examinaziun po sa restrenscher a la procuraziun d'infurmaziuns tar autras autoritads. Sche la persuna engaschada è activa en in sectur spezialmain sensibel, po ultra da quai vegnir dumandà in rapport davart la reputaziun. Pertutgads da talas controllas davart la segirezza da persunas pon per exempel esser terapeutas e terapeuts, persunal da segirezza privat, medias e medis u spiritualas e spirituals. La segirezza da persunas vegn examinada da la Polizia chantunala per incumbensa da l'autoritad executiva. Ella communitgescha il resultat al post da servetsch incaricant en furma d'in giudicament da las ristgas. Sin basa da quai decida l'autoritad d'execuziun giudiziala, sch'ella vul engaschar la persuna respectiva u betg. Cun la controlla da segirezza da persunas duai vegnir stgaffì in instrument che permetta d'examinar la confidenza da las terzas persunas engaschadas.

Incumbensas proactivas per il post da cussegliaziun
Dapi il settember 2007 gida il Post da cussegliaziun per persunas violentas ad evitar violenza. Quai cun mussar a persunas violentas – cun ina cussegliaziun specifica – vias or da la spirala da violenza. Il post da cussegliaziun dastga dentant pledentar da sai anora persunas violentas mo, sche la Polizia chantunala ordinescha in'expulsiun immediata u sche la persuna violenta vegn obligada tras ina disposiziun penala u civila da visitar ina cussegliaziun en cas da violenza. En ils ulteriurs cas sto il post da cussegliaziun sperar che las persunas violentas al contacteschian or d'atgna iniziativa e fetschian da sai anora diever da la purschida da cussegliaziun.

Tenor l'experientscha è quai per bleras persunas in obstachel memia grond. La Regenza vuless perquai rinforzar la cussegliaziun proactiva da persunas violentas, tras quai che la Polizia chantunala communitgescha en l'avegnir – tar mintga cas da violenza a chasa – las datas da contact da la persuna violenta al post da cussegliaziun. Questas persunas vegnan lura contactadas tant pli svelt dal post da cussegliaziun, per las gudagnar per ina cussegliaziun voluntara en cas da violenza. Uschia duai vegnir rutta la spirala da violenza e vegnir protegida la victima, e la persuna violenta duai surpigliar la responsabladad.

Agiunta:
missiva

Infurmaziuns:
cusseglier guvernativ Peter Peyer, schef dal Departament da giustia, segirezza e sanadad, tel. +41 81 257 25 01, e‑mail Peter.Peyer@djsg.gr.ch

Gremi: Regenza
Funtauna: rg Departament da giustia, segirezza e sanadad